Журналист ва профессор, Ўзбекистон Миллий медиа ассоциацияси бошқаруви раиси ҳамда Ўзбекистон журналистика ва оммавий коммуникациялар университети ректори Шерзодхон Қудратхўжа «СМА УМИД» хайрия фондининг юзи сифатида танлаб олинди. Бу ҳақда «Дарё»га Ўзбекистон Миллий медиа ассоциацияси хабар берди.
Маълум бўлишича, ушбу хайрия фонди даволаниши ва намоён бўлиши жиҳатидан мураккаб, мамлакат тиббиёти учун янгилик бўлган Спинал мушак атрофияси (СМА) билан касалланган болалар ва уларнинг ота-оналарига моддий, маънавий кўмак бериш мақсадида ўз фарзандларида касаллик кузатилган — Ниғматилла Юнусов ва Шерзод Раҳмонов томонидан ташкил этилган.
«СМА УМИД» хайрия фондининг илк Кенгаши йиғилишида фонд юритувчиси ва юзи сифатида Шерзодхон Қудратхўжа тайинланган.
Бу касаллик билан оғриган болалар учун керакли бўлган дори воситалари хорижий мамлакатлардан келиши ва саноқли компаниялар томонидан кам миқдорда ишлаб чиқарилиши сабабли жуда қимматбаҳо бўлиб, жамғарманинг асосий мақсади ушбу касаллик аниқланган болаларни дарҳол шифокор кўригига етказиш, улар учун зарур миқдордаги дори воситалари учун моддий ёрдам кўрсатиш ҳамда болаларнинг ота-оналарга манавий кўмак беришдан иборат. Жамғарма маблағларни хайрия йўли орқали йиғади ва оммага очиқ ҳолда, мақсадли тарқатади, — дейди Ўзбекистон Миллий медиа ассоциацияси масъулларидан бири Зайниддин Норқувватов.
Изоҳ (0)