Президент Шавкат Мирзиёев раислигида жорий йилнинг 12 февраль куни қишлоқ хўжалигида ишга солинмаган янги захираларни сафарбар этиш чора-тадбирлари муҳокамаси юзасидан видеоселектор йиғилиши ўтказилди.
Деҳқонларни янги агротехнологияларга ўқитиб, ҳосилдорликни пахтада 50 центнер, ғаллада 100 центнерга етказиш режа қилинмоқда.
Бу борада қишлоқ хўжалигини механизациялаш ва энг замонавий техникалар билан таъминлаш устувор вазифа. Президент раислигида ўтказилган йиғилишда эътибор қаратилган айни шу масалалар юзасидан “ЎзАгролизинг” бошқарув раиси Нодир Отажонов ўз фикрлари билан бўлишди:
Мана 24 йилдирки “Ўзагролизинг” акциядорлик жамияти Ўзбекистон лизинг бозорида етакчи ўринларни эгаллаб, юртимизда қишлоқ хўжалиги соҳасини ривожлантириш, аҳолини озиқ-овқат маҳсулотлари билан таъминлаш ва озиқ-овқат хавфсизлигига ўзининг муносиб ҳиссасини қўшиб келмоқда.
Фермер хўжаликлари ва ҳамда қишлоқ хўжалиги соҳасининг бошқа вакилларига энг замонавий техникаларни етказиб бериш олдимизда турган устувор вазифадир. Муҳтарам Президентимиз раислигида ўтказилган йиғилишда айни шу масалаларга эътибор қаратилди.
Юртбошимиз томонидан қишлоқ хўжалигида сафарбар қилинмаган янги захираларни ишга солиш, харажатларни пасайтириб, шу орқали деҳқонлар даромадини кўпайтириш, ерларимиз унумдорлиги, ҳосилдорликни ошириш бўйича барча соҳаларда аниқ вазифалар белгилаб берилди. Механизация, операторларни ўқитиш масалаларига эътибор қаратилди.
“ЎзАгролизинг” акциядорлик жамиятига жорий йил қишлоқ хўжалигига 10 мингдан ортиқ замонавий энергия тежамкор қишлоқ хўжалиги техникаларини етказиб бериш вазифаси юклатилди. Ҳозирга қадар ҳудудлар кесимида бу техникаларнинг эгаларини аниқлаштириб, ҳисоб-китоб қилиб олдик.
Йиғилишда жамиятимиз зиммасига қатор вазифаларни юклаш билан бирга олдин мавжуд бўлмаган янги молиявий манбалар ажратилиши белгиланди.
Ҳусусан, 100 млн доллар миқдорида 10 йилга кредит ажратиляпти, бир йиллик имтиёзли даври ҳам бор. Ундан ташқари Жаҳон банкидан 40 млн. доллар, Япониянинг Халқаро ҳамкорлик ташкилотидан ҳам 40 млн. доллар маблағ жалб қилиняпти, бу маблағлар 10 йилга берилади ва уч йиллик имтиёзли даври ҳам бўлади. Яна бир муҳим жиҳати, бу ажратилаётган маблағлар навбат билан ишлатилади. Мазкур маблағлар ўзлаштирилгандан сўнг кейинги кредит линияларини очишга имконият яратилади. Бу дегани, 10 минг дона техника билан чекланмаймиз, талаб бўлса, бундан ҳам кўпини етказиб берамиз.
Техникаларни лизингга олиш бўйича мурожаатларни кўриб чиқиш муддати 3 кундан ошмайди. Мурожаат қилувчилар эгалигидаги ер майдони, оладиган ҳосили, даромади ва банкдаги айланма маблағлари ҳақида маълумотларни ҳамда бизнес-режаларини топширишади. Ҳужжатлар тезкорлик билан кўриб чиқилиб, техникалар қисқа муддатда етказиб берилади. Оғир техникаларга 10 йилгача, кичикроқ техникаларга эса 3-5 йилгача лизинг қилиб берилади.
2024 йилда “Ўзагролизинг” АЖ биринчи навбатда хорижий молия бозоридан узоқ муддатли, паст фоизли маблағларни жалб қилиш ҳисобига деҳқон, фермерларга узоқ муддатли, нисбатан арзон нархларда қишлоқ хўжалиги техникаларини етказиб беришни асосий вазифа сифатида ўз олдига мақсад қилган. Ўтган йилгига нисбатан етказиб бериш ҳажми 5 баробарга ўсиши кутиляпти.
Олдин ички манбалардан маблағ жалб қилишда муаммолар бўларди. Сўнгги уч йилда компания молия тизими халқаро стандартларга мослаштирилиб, ташқи манбалардан ҳам маблағ ола бошладик. Хориждан экспертлар жалб қилинди. Жаҳон банки ҳамда Япония Халқаро ҳамкорлик ташкилотининг экспертлари текширувида фаолиятимиз таҳлили ижобий баҳоланди. Уларнинг хулосаси натижасида янги кредит линияларида иштирок этиш ҳуқуқига эга бўлдик, бу эса бизнинг имкониятларимизни оширди.
Республикамизнинг барча ҳудудларида ҳудудий филиаллари бор, боғланиш учун телефон рақамлар ишлаб турибди. Шунингдек, деҳқон ҳамда фермерлар саволлар билан бирга ўз таклифларини беришлари ҳам мумкин. Ходимларимиз техникаларнинг афзалликларини тушунтирган ҳолда мижозларга барча зарур тавсияларни беришади.
Изоҳ (0)