Prezident Shavkat Mirziyoyev raisligida joriy yilning 12-fevral kuni qishloq xo‘jaligida ishga solinmagan yangi zaxiralarni safarbar etish chora-tadbirlari muhokamasi yuzasidan videoselektor yig‘ilishi o‘tkazildi.
Dehqonlarni yangi agrotexnologiyalarga o‘qitib, hosildorlikni paxtada 50 sentner, g‘allada 100 sentnerga yetkazish reja qilinmoqda.
Bu borada qishloq xo‘jaligini mexanizatsiyalash va eng zamonaviy texnikalar bilan ta’minlash ustuvor vazifa. Prezident raisligida o‘tkazilgan yig‘ilishda e’tibor qaratilgan ayni shu masalalar yuzasidan “O‘zAgrolizing” boshqaruv raisi Nodir Otajonov o‘z fikrlari bilan bo‘lishdi:
Mana 24 yildirki “O’zagrolizing” aksiyadorlik jamiyati O‘zbekiston lizing bozorida yetakchi o‘rinlarni egallab, yurtimizda qishloq xo‘jaligi sohasini rivojlantirish, aholini oziq-ovqat mahsulotlari bilan ta’minlash va oziq-ovqat xavfsizligiga o‘zining munosib hissasini qo‘shib kelmoqda.
Fermer xo‘jaliklari va hamda qishloq xo‘jaligi sohasining boshqa vakillariga eng zamonaviy texnikalarni yetkazib berish oldimizda turgan ustuvor vazifadir. Muhtaram Prezidentimiz raisligida o‘tkazilgan yig‘ilishda ayni shu masalalarga e’tibor qaratildi.
Yurtboshimiz tomonidan qishloq xo‘jaligida safarbar qilinmagan yangi zaxiralarni ishga solish, xarajatlarni pasaytirib, shu orqali dehqonlar daromadini ko‘paytirish, yerlarimiz unumdorligi, hosildorlikni oshirish bo‘yicha barcha sohalarda aniq vazifalar belgilab berildi. Mexanizatsiya, operatorlarni o‘qitish masalalariga e’tibor qaratildi.
“O‘zAgrolizing” aksiyadorlik jamiyatiga joriy yil qishloq xo‘jaligiga 10 mingdan ortiq zamonaviy energiya tejamkor qishloq xo‘jaligi texnikalarini yetkazib berish vazifasi yuklatildi. Hozirga qadar hududlar kesimida bu texnikalarning egalarini aniqlashtirib, hisob-kitob qilib oldik.
Yig’ilishda jamiyatimiz zimmasiga qator vazifalarni yuklash bilan birga oldin mavjud bo‘lmagan yangi moliyaviy manbalar ajratilishi belgilandi.
Hususan, 100 mln dollar miqdorida 10 yilga kredit ajratilyapti, bir yillik imtiyozli davri ham bor. Undan tashqari Jahon bankidan 40 mln. dollar, Yaponiyaning Xalqaro hamkorlik tashkilotidan ham 40 mln. dollar mablag‘ jalb qilinyapti, bu mablag’lar 10 yilga beriladi va uch yillik imtiyozli davri ham bo‘ladi. Yana bir muhim jihati, bu ajratilayotgan mablag‘lar navbat bilan ishlatiladi. Mazkur mablag‘lar o‘zlashtirilgandan so‘ng keyingi kredit liniyalarini ochishga imkoniyat yaratiladi. Bu degani, 10 ming dona texnika bilan cheklanmaymiz, talab bo‘lsa, bundan ham ko‘pini yetkazib beramiz.
Texnikalarni lizingga olish bo‘yicha murojaatlarni ko‘rib chiqish muddati 3 kundan oshmaydi. Murojaat qiluvchilar egaligidagi yer maydoni, oladigan hosili, daromadi va bankdagi aylanma mablag’lari haqida ma’lumotlarni hamda biznes-rejalarini topshirishadi. Hujjatlar tezkorlik bilan ko‘rib chiqilib, texnikalar qisqa muddatda yetkazib beriladi. Og‘ir texnikalarga 10-yilgacha, kichikroq texnikalarga esa 3-5-yilgacha lizing qilib beriladi.
2024-yilda “O‘zagrolizing” AJ birinchi navbatda xorijiy moliya bozoridan uzoq muddatli, past foizli mablag‘larni jalb qilish hisobiga dehqon, fermerlarga uzoq muddatli, nisbatan arzon narxlarda qishloq xo‘jaligi texnikalarini yetkazib berishni asosiy vazifa sifatida o‘z oldiga maqsad qilgan. O‘tgan yilgiga nisbatan yetkazib berish hajmi 5 barobarga o‘sishi kutilyapti.
Oldin ichki manbalardan mablag‘ jalb qilishda muammolar bo‘lardi. So‘nggi uch yilda kompaniya moliya tizimi xalqaro standartlarga moslashtirilib, tashqi manbalardan ham mablag‘ ola boshladik. Xorijdan ekspertlar jalb qilindi. Jahon banki hamda Yaponiya Xalqaro hamkorlik tashkilotining ekspertlari tekshiruvida faoliyatimiz tahlili ijobiy baholandi. Ularning xulosasi natijasida yangi kredit liniyalarida ishtirok etish huquqiga ega bo‘ldik, bu esa bizning imkoniyatlarimizni oshirdi.
Respublikamizning barcha hududlarida hududiy filiallari bor, bog‘lanish uchun telefon raqamlar ishlab turibdi. Shuningdek, dehqon hamda fermerlar savollar bilan birga o‘z takliflarini berishlari ham mumkin. Xodimlarimiz texnikalarning afzalliklarini tushuntirgan holda mijozlarga barcha zarur tavsiyalarni berishadi.
Izoh (0)