Сирдарё вилоятида 3 нафар истеъмолчи 632 миллион сўмдан зиёд табиий газдан ноқонуний фойдалангани аниқланди. Бу ҳақда Энергетика вазирлиги ахборот хизмати хабар берди.
Унга кўра, Энергетика вазирлиги ҳузуридаги “Ўзэнергоинспекция” томонидан Бош прокуратура, ИИВ ҳамда газ таъминоти корхоналари мутахассислари билан ҳамкорликда Сирдарё вилоятида ўтказилган назорат тадбирларида табиий газдан ноқонуний фойдаланиш ҳолатлари аниқланди.
Хусусан, Гулистон туманида истиқомат қилувчи фуқаро Й.П. хонадонида яширин тарзда бодроқ цехи ташкил қилиб, табиий газдан ноқонуний фойдаланиши натижасида давлат манфаатларига 339 миллион 143 минг сўмлик зарар етказилгани маълум бўлди.
Янгиер шаҳрида эса “К.А.Т.” МЧЖга қарашли ошхона (231 миллион 140 минг сўм) ҳамда “Н.С.З.С.” якка тартибдаги тадбиркорлик субъектига қарашли новвойхона (61 миллион 860 минг) газ қувурига техник иш режимини бузишга олиб келадиган қурилмалар (яъни сўрувчи насос) ўрнатиб, газ тармоғига улангани натижасида давлат манфаатларига жами 293 миллион сўмлик зарар етказилгани аниқланди.
Қоидабузар истеъмолчиларга нисбатан белгиланган тартибда чоралар кўриш учун тегишли ҳужжатлар расмийлаштирилиб, ҳуқуқни муҳофаза этувчи органларга тақдим қилинди.
Изоҳ (0)