Ўзбекистоннинг уч вилоятида газ ва “свет”дан ноқонуний фойдаланиш ҳолатлари аниқланди

Қува, Бўстонлиқ, Чиноз ва Самарқанд туманларида табиий газ ва электр энергиясидан ноқонуний фойдаланиш ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, департаментнинг Қува туман бўлими томонидан ўтказилган  терговга қадар текширувда “З.Й.” МЧЖ раҳбари Д.Д. “Юқориқишлоқ” ҳудудида жойлашган иссиқхонани ҳеч қандай ҳужжатсиз тижорат мақсадида умумий фойдаланишдаги электр тармоғига ўғрилик йўли билан улаб, жами 118,6 млн сўмлик электр энергиясидан ноқонуний фойдаланганлиги аниқланган.

Шу каби, департаментнинг Бўстонлиқ туман бўлими томонидан газ таъминоти бўлими ходимлари билан ҳамкорликда ўтказилган терговга қадар текширувда “Н.Х.” оилавий корхонаси таъсисчиси Х.Р. “Боғчаовул” МФЙда жойлашган паррандачилик фаолияти билан шуғулланувчи бинони ҳеч қандай ҳужжатсиз тижорат мақсадида умумий фойдаланишдаги газ тармоғига ўғрилик йўли билан улаб, жами 114,4 млн сўмлик табиий газдан ноқонуний фойдаланганлиги аниқланган.

Департаментнинг Чиноз туман бўлими томонидан ИИБ ва “Чинозтумангаз” таъминоти бўлими ходимлари билан ҳамкорликда ўтказилган терговга қадар текширувда “Ачамайли” МФЙда яшовчи Н.Р. ўз уйида ташкил этган иссиқхонани ҳеч қандай ҳужжатсиз умумий фойдаланишдаги газ тармоғига ўғрилик йўли билан улаб, жами 112,4 млн сўмлик табиий газдан ноқонуний фойдаланганлиги аниқланган.

Департаментнинг Самарқанд туман бўлими томонидан ўтказилган терговга қадар текширувда эса, “Юқори Қайнама” МФЙда яшовчи фуқаро А.Ш. яшаш хонадонида иссиқхона ташкил этиб, уни ҳеч қандай ҳужжатсиз тижорат мақсадида умумий фойдаланишдаги газ тармоғига ўғрилик йўли билан улаб, жами 104,4 млн сўмлик табиий газдан ноқонуний фойдаланганлиги аниқланган.

Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.