Олий Мажлис Қонунчилик палатасининг Халқаро ишлар ва парламентлараро алоқалар қўмитаси раиси Дилором Файзиева бошчилигидаги Ўзбекистон делегацияси Польшага ташрифи доирасида Сейм (қуйи палата) раиси ўринбосари Кристоф Босак ва Сенат вице-маршали Михал Каминский билан учрашув ўтказди, деб хабар берди “Дунё” АА.
Учрашувларда икки томонлама ҳамкорликнинг бугунги ҳолати ва истиқболлари муҳокама қилинган. Икки мамлакат ўртасида парламентлараро ҳамкорликни ривожлантириш, ҳудудлараро алоқаларни фаоллаштириш, савдо, транспорт йўлаклари, “яшил” иқтисодиёт ва бошқа масалалар кўриб чиқилган.
Хабарда айтилишича, томонлар икки давлатнинг сиёсий, савдо-иқтисодий доира вакиллари ўртасидаги алоқалар фаоллашганини қайд этган ҳолда, давлатлараро ҳамкорликнинг асосий йўналишларини амалга ошириш учун самарали шартномавий-ҳуқуқий базани яратиш бўйича ишларни давом эттириш зарурлигини таъкидлади.
Ўзбекистон ва Польша парламентларининг сармояларни жалб этиш, иқтисодиётнинг турли тармоқлари ўртасидаги алоқалар кўламини кенгайтириш, таълим ва технологиялар соҳасидаги ҳамкорликни мустаҳкамлаш борасидаги имкониятларидан кенг фойдаланиш масалалари хусусида фикр алмашилди.
Сейм спикери ўринбосари Кшиштоф Босак Ўзбекистон томонига Польша парламенти билан конструктив мулоқот, ўзаро манфаатли муносабатларни мустаҳкамлаш тарафдори эканлиги учун миннатдорлик билдирди. Парламент аъзосининг айтишича, сўнгги пайтларда ЕИда иқлим бўйича кун тартиби мустаҳкамланган ва аъзо мамлакатлардаги ишлаб чиқарувчилар учун турли тўловлар жорий этилган.
Сенат вице-маршали Михал Каминскининг таъкидлашича, Польша икки давлат манфаатларини ҳисобга олган ҳолда Ўзбекистон билан ўзаро манфаатли ҳамкорликни янада чуқурлаштириш тарафдоридир. Шу нуқтайи назардан, Ўзбекистондаги барқарорлик Марказий Осиёда иқтисодий ўсиш ва интеграция жараёнларини фаоллаштиришнинг калити ҳисобланади.
“Марказий Осиё давлатларида барқарор хавфсизликни таъминлаш Польша томони манфаатларига тўлиқ жавоб беради”, — деди у.
Польша томони 2024 йилнинг март ойида Тошкент—Варшава тўғридан тўғри ҳаво қатновларининг йўлга қўйилиши Ўзбекистон—Польша ҳамкорлигини ижтимоий-иқтисодий, маданий-гуманитар соҳаларда кенгайтиришда муҳим аҳамият касб этишини қайд этди.
Изоҳ (0)