Сурхондарёда 2024 йили 1,3 минг гектар майдон деҳқон хўжалиги ташкил этиш учун ажратилади, деб хабар бермоқда вилоят ҳокимлиги матбуот хизмати.
Маълум қилинишича, вилоят ҳокими Улуғбек Қосимов Термиз туманида бўлиб, “Нурафшон” маҳалласидаги аукционга чиқарилган 6 гектар ер майдонининг 1 гектар қисмида иссиқхона ташкил этиш, кўчатчилик ва сабзавот маҳсулотлари етиштириш, ушбу соҳада аҳолини ўқитиш, 2024 йилда деҳқон хўжалиги ташкил этиш учун ажратиладиган 1 353 гектар ер майдонлари тақдимоти билан танишган.
Шунингдек, “Лето” корхонасига ажратиш учун таклиф этилган 100 гектар ер майдони ҳам тақдимот қилинган. Мутасаддиларга тақдимотлар юзасидан тегишли вазифалар белгилаб берилган.
Вилоят раҳбари Ангор тумани “Илғор” маҳалласида деҳқон хўжаликлари ташкил этилган, сув таъминоти оғир бўлган 14,1 гектар ер майдонидаги сув муаммосига ҳам эътибор қаратган. Ҳоким бурғилаш ишларини олиб бориб, сув насоси ўрнатиш учун зарур маблағни ажратиш масаласида топшириқ берган.
Улуғбек Қосимов, шунингдек, Жарқўрғон туманининг “Қўштепа” маҳалласига туташ ҳудуддаги 318 гектар ер майдонини ўзлаштириш ва кооперативлар ташкил этиш лойиҳаси билан танишган. Ушбу маҳаллада қишлоқ хўжалиги маҳсулотлари етиштираётган аҳоли хонадонларидаги иссиқхоналар, кўчатчилик фаолияти кўздан кечирилган.
Мутасаддиларга аҳолининг ёқилғисиз иситиладиган ва томчилаб суғориш орқали маҳсулот етиштириш тажрибасини оммалаштириш, намуна асосида бошқа ҳудудларда ҳам ихчам иссиқхоналар фаолиятини йўлга қўйиш топширилган.
Изоҳ (0)