Сурхондарё вилояти ҳокими Улуғбек Қосимов муаммоларни кўтариб чиқиб, ҳокимликка яқиндан ёрдам бераётган журналист ва блогерларга миннатдорлик изҳор қилди. Вилоят раҳбари бу ҳақда ҳокимлик соатида гапирган.
Ҳокимлик ахборот хизматининг маълумот беришича, ҳокимлик соати йиғилишида ҳафта давомида бажарилиши лозим бўлган муҳим вазифаларни белгилаб олиш ҳамда ижро интизоми, аҳоли мурожаатлари билан ишлаш, хусусан, ишонч телефони ва ижтимоий тармоқлар орқали журналист, блогерлар томонидан кўтариб чиқилган ҳудудлардаги муаммоларнинг ҳал этилиши таҳлил этилган.
Мазкур йиғилишда вилоят, шаҳар ва туманларнинг сектор раҳбарлари, ташкилот, бошқармалар бошлиқлари, ҳудудий студиялардан алоқадор масъуллар ҳамда журналист, блогерлар ва жамоатчилик фаоллари иштирок этган.
Жойларда муаммоларни кўтариб чиқиб, бизга яқиндан кўмакчи бўлаётган журналист ва блогерларимизга раҳмат. Бу масалага ҳар бир раҳбар ва масъуллар жиддий эътибор қаратиб, мурожаатлар ижросини сифатли таъминлаши, аҳолини қийнаб келаётган муаммоларни ҳал этиши лозим, — деди вилоят раҳбари.
Улуғбек Қосимовнинг матбуот котиби Муродбек Давлатовнинг “Дарё”га қўшимча қилишича, вилоятда журналист ва блогерлардан иборат жамоатчилик кенгаши ташкил этилган бўлиб, улар ҳудудда ўзлари кўрган ёки мурожаат қилинган муаммолар ҳақида масъулларни огоҳлантириб, маълум қилади. Шу тариқа муаммолар белгиланган муддатда ечимини топади.
Ҳокимлик соатида, шунингдек, ҳудудларга ташрифлар давомида берилган топшириқлар ижроси, “Яшил макон” умуммиллий лойиҳасининг кузги дарахт экиш мавсумига тайёргарлик кўриш масалалари ҳам муҳокама қилинган.
Вилоят раҳбари суғориш тизими бўлмаган ва сифатсиз 100 та дарахт эккандан, агротехник талаблар асосида битта дарахт экиб, уни парваришлаш, эртага экологияни мусаффолигини сақлашда ва чанг-тўзонларнинг олдини олишда муҳим ўрин тутишини таъкидлади, — дейди ҳокимлик ахборот хизмати раҳбари.
Изоҳ (0)