Украина президенти Владимир Зеленский мамлакат қуролли кучлари бош қўмондони Валерий Залужнийни истеъфога чиқаргани сабабини маълум қилди.
Зеленскийнинг сўзларига кўра, Украина 2023 йили Россияга қарши урушда муваффақиятга эриша олмади. Шу сабабли Украина армияси ўзгаришларга муҳтож.
“Биринчи йил туриб бера олдик. Ўзимизникиларни (ҳудудларни) қайтариб ола бошладик. Бутун дунёга Россия ютқазиши мумкинлигини исботладик. Урушнинг иккинчи йилида Қора денгизда ғалаба қозондик. Қишда ғалабага эришдик. Украина осмони устидан назоратни қайта қўлга кирита олишимизни исботладик. Аммо, афсуски, давлатимизнинг ердаги мақсадларига эриша олмадик”, — деди у.
Зеленский ҳозирда фронтнинг жанубий йўналишларида “турғунлик ҳисси” ва Донецк вилоятидаги жангларда қийинчиликлар борлигини таъкидлади. Бу украиналикларнинг умумий кайфиятига таъсир қилган.
“Украиналиклар ғалаба ҳақида гапиришни камайтирди. Аммо украин руҳи ғалабага ишончини йўқотгани йўқ. Украина ўзининг тарихий имкониятини сақлаб қолмоқда. Буни амалга ошириш бизнинг бурчимиздир. Бу йил ҳар бир украин аскари, аввалгидек, Украина давлати, Украина армияси ғалаба қозонишга қодирлигини билиб оладиган даврга айланиши керак.
Украина президенти Залужний билан армияда “шошилинч ўзгаришлар” зарурлиги ҳақида очиқ гапирганини таъкидлади.
“Гап фамилиялар ёки ҳатто сиёсат ҳақида ҳам эмас. Бу бизнинг армиямиз тизими, Украина қуролли кучларини бошқариш ва урушнинг жанговар командирлари тажрибасини жалб қилиш ҳақидадир. Ҳар бир аскар, ҳар бир сержант ва ҳар бир фронтни кўрган офицер қандай қарорлар қабул қилиш кераклигини тушунади. Барча даражадаги штаб-квартиралар фронтни “нол”даги аскарлар каби билиши ва ҳис қилиши керак”, — дейди сиёсатчи.
Унинг таъкидлашича, Россия-Украина урушининг жанговар қўмондонлари ўзларининг махсус тажрибасини бутун армия даражасида амалга ошириш имкониятига эга бўлиши керак. Зеленский ҳозир армияда миллионга яқин одам борлигини, бироқ уларнинг аксарияти “фронтни ҳис қилмаганини”, озчилик эса аслида фронтда жанг қилаётганини таъкидлади.
“Бу бошқача ёндашув зарурлигини, хусусан, ротацияга нисбатан эҳтиёж борлигини билдиради. Фронт бошқарувида ўзгача ёндашув. Мобилизация ва ёллашда эса бошқача ёндашув”, — деди Зеленский.
Залужнийни ишдан бўшатиш
8 февраль куни президент Владимир Зеленский Валерий Залужнийни Украина қуролли кучлари бош қўмондони лавозимидан озод қилди. Унинг ўрнига Киевни муваффақиятли ҳимоя қилиш ва Харьков вилоятида қарши ҳужум билан машҳур бўлган генерал-полковник Александр Сирский тайинланди.
“Украина қуролли кучлари раҳбариятини янги бошқарув гуруҳи ўз зиммасига олади. Мен Работино ёки Авдеевкадаги аскарларимиз, Бош штаб ва штаб-квартирада уруш ҳақидаги қарашлар бирлашишини истайман”, — деди Украина президенти.
Изоҳ (0)