Украина президенти Владимир Зеленский биринчи марта Украина Қуролли кучлари бош қўмондони Валерий Залужнийни ишдан бўшатмоқчилигини тасдиқлади. Бу ҳақда Украина президенти Италиянинг Rai телеканали эфирида айтиб ўтди.
Зеленский нафақат Залужнийни, балки бошқа юқори лавозимли амалдорларни ҳам ишдан бўшатиш масаласини кўриб чиқаётганини қўшимча қилди.
“Албатта, қайта ишга тушириш ва янгиланиш зарур. Бу ҳақда гапирганда, мен нафақат ҳарбий соҳада, балки давлатнинг бир қатор етакчи амалдорларини алмаштиришни назарда тутяпман. Мен бу алмаштириш (Залужний) ҳақида ўйлаяпман, бу ҳақиқат. Масала мамлакат машинасини бошқарадиган бутун бошқарув гуруҳига тегишли”, — деди Зеленский Залужний билан келишмовчиликлар ҳақидаги саволга жавоб берар экан.
“Агар ғалаба қозонишни истасак, барчамиз бир йўналишда ҳаракат қилишимиз керак, ғалабага ишончимиз комил экан, биз тушкунликка тушмаслигимиз, таслим бўлмаслигимиз, ижобий энергияга эга бўлишимиз керак... Шунинг учун мен қайта ишга тушириш, алмаштириш ҳақида гапиряпман... Хаёлимда жиддий нарса бор, гап бир киши ҳақида эмас, балки мамлакат раҳбариятининг йўналиши ҳақида кетмоқда. Залужнийни алмаштириш масаласи мамлакатни бошқарадиган одамлар масаласидир. Мен нафақат армиядаги, балки мамлакатнинг айрим раҳбарларини алмаштириш ниятидаман”, — деб тушунтирди Зеленский.
Залужнийнинг истеъфоси ҳақидаги миш-мишлар
Украина ва жаҳон оммавий ахборот воситалари Украина Қуролли кучлари бош қўмондони истеъфога чиқиши ҳақида 29 январь куни Украина президенти Валерий Залужний билан учрашган кундан буён гапирмоқда. Ушбу учрашувда, турли нашрлар манбаларига кўра, Зеленский бош қўмондонни ишдан бўшатишини айтган. Суҳбатдан сўнг Тhe Times манбаларининг айтишича, халқаро ҳамкорлар, шу жумладан АҚШ ва Буюк Британия “ўз хавотирларини билдирган”. Украина президентининг офиси ва Мудофаа вазирлиги Залужний ишдан бўшатилишини расман рад этди.
Изоҳ (0)