Экзит-полл маълумотлари Озарбайжондаги президентлик сайловларида Илҳом Алиев ғалаба қозонганини кўрсатди

Озарбайжоннинг амалдаги президенти Илҳом Алиев мамлакатдаги навбатдан ташқари президентлик сайловларида ғалаба қозонди ва 93,9 фоиз овоз олди.

Бу маълумотлар чоршанба куни кечқурун экзит-полл ўтказган Американинг Oracle маслаҳат гуруҳи томонидан тақдим этилди.

Сўров натижаларига кўра, қолган олти номзод 0,3 фоиздан 1,8 фоизгача овоз тўплаган.

Социологик тадқиқотлар маркази ўтказган экзит-полл натижаларига кўра, Алиев 92,4 фоиз овоз тўплаган. Чоршанба куни кечқурун бўлиб ўтган брифингда марказ вакили шундай маълумотларни тақдим этди.

Ушбу экзит-полл натижаларига кўра, Зоҳид Ўруж 2,2 фоиз, Фозил Мустафо — 2 фоиз, Гудрят Гасангулиев — 1,6 фоиз, Элшод Мусаев — 0,8 фоиз, Рози Нуруллаев — 0,6 фоиз, Фуад Алиев — 0,4 фоиз овоз олган.

Озарбайжонда президент етти йилга сайланади, муддатлар сони бўйича ҳеч қандай чекловлар йўқ.

Аввалги президентлик сайловлари 2018 йилнинг апрель ойида бўлиб ўтганди. Унда Илҳом Алиев 86,22 фоизи овоз билан ғалаба қозонганди.

Алиев Озарбайжонни 2003 йилнинг октябридан бери бошқариб келади.