Озарбайжон Марказий сайлов комиссияси 7 февраль куни бўлиб ўтадиган президентлик сайловларига 17 киши номзодини кўрсатишни маъқуллади, бироқ улардан 10 нафари рўйхатга олиш учун зарур бўлган ҳужжатларни комиссияга тақдим этишга улгурмади.
Уларнинг номзоди рўйхатга олинмайди – ҳужжатларни топшириш муддати 8 январь куни соат 18:00 да тугади. Ўз номзодини қўллаб-қувватлаш учун атиги етти киши имзо варақаларини топширди, улардан уч нафари аллақачон рўйхатга олинган — “Янги Озарбайжон” партиясидан амалдаги президент Илҳом Алиев, “Миллий фронт партияси”дан Рази Нуруллаев ва мустақил номзод Зоҳид Оруж.
Аввалроқ уларнинг уч нафар рақиби байрам кунларини ҳисобга олган ҳолда имзо тўплаш муддатини узайтириш талаби билан МСКга мурожаат қилиб, комиссия биноси олдида норозилик намойиши ўтказган эди. Аммо Марказий сайлов комиссияси уларнинг илтимосини ҳам кўриб чиқмади. Накизад Сафаров, Мадлаб Муталлимов ва Сярван Керимов норозилик белгиси сифатида имзо варақаларини йиртиб ташлашди. Бундан ташқари, Сафаров рақибларини сохталикда айблади.
Бошқа номзодлар — мустақил номзод Фуад Алиев (Либерал-демократик партиянинг собиқ раҳбари), “Буюк бунёдкорлик” партияси вакили Фозил Мустафо, “Буюк Озарбайжон” партиясидан Элшад Мусаев, “Бутун Озарбайжон Халқ фронти” партияси Гудрат Ҳасангулиев Марказий сайлов комиссиясида рўйхатдан ўтиш учун зарур бўлган ҳужжатларни тақдим этмаган.
Эслатиб ўтамиз, 7 декабрь куни президент Илҳом Алиев Озарбайжонда муддатидан олдин президентлик сайлови ўтказилишини эълон қилиш ҳақидаги фармонни имзолаганди. Унинг давлат раҳбари сифатидаги амалдаги етти йиллик ваколати 2025 йилнинг апрелида тугайди. 2018 йилнинг 11 апрелида Алиев кетма-кет тўртинчи марта президент лавозимига қайта сайланди.
Изоҳ (0)