Европа кенгаши раҳбари Шарл Мишел Украина ҳудудларини бериб юбориш эвазига тинчликка эришиш ҳақидаги чақириқларни қаттиқ танқид қилди.
Европарламентдаги чиқиши чоғида у босиб олинган ҳудудлар Россия Федерацияси назорати остида қолиши шарти билан Украинада тинчлик ўрнатишга чақириқлардан ҳайратда қолганини таъкидлади.
“Радикал сўлларнинг Украинага қурол етказиб беришни тўхтатишимиз керак, деган даъволаридан ҳайратда қолдим. Сиз украиналиклар сув тўппончаси билан ўзларини ҳимоя қилишларини хоҳлайсизми?” — деди Мишел.
Унинг сўзларига кўра, Украинага сарфланган ҳар бир евро “Европа Иттифоқи хавфсизлиги манфаати учун” хизмат қилади.
“Шубҳа ва қўрқувни кучайтираётганларга жавобим: Украинани қўллаб-қувватлаш учун сармоя қилинган ҳар бир евро бизнинг хавфсизлигимиз, Европа Иттифоқининг фаровонлиги ва барқарорлигига сармоядир. Украинага кўпроқ қурол, кўпроқ снаряд ва кўпроқ ёрдам керак”, — деди ташкилот раҳбари.
У, шунингдек, АҚШ Конгресси Вакиллар палатасига мурожаат қилиб, Киевга Украинанинг молиявий барқарорлиги учун зарур бўлган 60 миллиард долларни тезда етказиб беришга чақирди.
Изоҳ (0)