“Ukrainaliklar o‘zlarini suv to‘pponchasi bilan himoya qilishlarini xohlayapsizmi?” — Sharl Mishel

Yevropa kengashi rahbari Sharl Mishel Ukraina hududlarini berib yuborish evaziga tinchlikka erishish haqidagi chaqiriqlarni qattiq tanqid qildi.

Yevroparlamentdagi chiqishi chog‘ida u bosib olingan hududlar Rossiya Federatsiyasi nazorati ostida qolishi sharti bilan Ukrainada tinchlik o‘rnatishga chaqiriqlardan hayratda qolganini ta’kidladi.

“Radikal so‘llarning Ukrainaga qurol yetkazib berishni to‘xtatishimiz kerak, degan da’volaridan hayratda qoldim. Siz ukrainaliklar suv to‘pponchasi bilan o‘zlarini himoya qilishlarini xohlaysizmi?” — dedi Mishel.

Uning so‘zlariga ko‘ra, Ukrainaga sarflangan har bir yevro “Yevropa Ittifoqi xavfsizligi manfaati uchun” xizmat qiladi.

“Shubha va qo‘rquvni kuchaytirayotganlarga javobim: Ukrainani qo‘llab-quvvatlash uchun sarmoya qilingan har bir yevro bizning xavfsizligimiz, Yevropa Ittifoqining farovonligi va barqarorligiga sarmoyadir. Ukrainaga ko‘proq qurol, ko‘proq snaryad va ko‘proq yordam kerak”, — dedi tashkilot rahbari. 

U, shuningdek, AQSH Kongressi Vakillar palatasiga murojaat qilib, Kiyevga Ukrainaning moliyaviy barqarorligi uchun zarur bo‘lgan 60 milliard dollarni tezda yetkazib berishga chaqirdi.