Европа Кенгаши президенти Шарл Мишель 2024 йил июлида бўлиб ўтадиган Европарламент сайловларида қатнашмасликка қарор қилди, бу унинг муддатидан аввал истеъфога чиқишига олиб келиши мумкин эди. Мишель ўз қарорини Facebook'даги саҳифасида маълум қилди.
Унинг сўзларига кўра, Европа Кенгаши президенти лавозимида қолиш қарори унинг муддатидан олдин истеъфога чиқиши эҳтимоли туфайли юзага келган “кескин реакция” билан боғлиқ.
“Менинг танловим оммавий ахборот воситаларида катта шов-шув ва тахминларга сабаб бўлди. Ёндашувимнинг мисли кўрилмаган табиатини ҳисобга олган ҳолда, мен олдиндан ниманидир кўргандим. Лекин бу ҳам кескин реакцияга сабаб бўлди: Европа Кенгаши ичида эмас, балки ундан ташқарида”, — деб ёзади Мишел.
Шунингдек, у ўз қарори билан ҳеч қандай тарзда Европа Иттифоқидаги бирликка зарар етказишни истамаслигини ва шунинг учун сайловларда қатнашишдан бош тортиш фикрига келганини қўшимча қилди.
“Мен ўзимнинг ҳозирги мажбуриятларимни ваколатим тугамагунча қатъият билан бажаришга ҳаракат қиламан”, — деди Мишел.
Унинг Европа кенгаши президенти сифатидаги ваколати 2024 йилнинг ноябрида тугайди.
Шарл Мишель 2024 йил январь ойи бошида Европарламент сайловларида иштирок этиш ниятини маълум қилганди. Агар Мишель сайланса, Европа Иттифоқи давлатлари тезда унинг ўрнига ўринбосар танлаши керак бўларди. Улар буни уддалай олмаса, Европа Кенгашига раислик Венгрия бош вазири Виктор Орбанга ўтиши керак эди, чунки Венгрия 2024 йил июлидан декабргача ЕИ кенгашига раислик қилади.
Изоҳ (0)