Бирлашган Миллатлар Ташкилотининг юқори мартабали мулозимлари “Толибон” ҳукумати ташқи ишлар вазири билан бир неча учрашувларда Доҳадаги йиғилишда Кобулдан юқори мартабали делегация иштирок этишини сўраган бўлса-да, “Толибон” бу учрашувда иштирок этишига шубҳа қилмоқда.
Афғонистон бўйича Доҳа учрашуви яқинлашаётган бир пайтда, БМТнинг юқори мартабали расмийларининг “Толибон”ни ушбу учрашувда иштирок этишга кўндиришга уринишлари кўпайди.
Ушбу йиғилиш икки ҳафтадан сўнг февраль ойининг охирларида халқаро ташкилотлар вакиллари иштирокида ўтказилиши режалаштирилган, бироқ иштирокчилар рўйхати ва унинг кун тартиби ҳалигача аниқланмаган.
Бирлашган Миллатлар Ташкилоти ушбу йиғилиш Афғонистонда халқаро иштирокни янада уйғун, мувофиқлаштирилган ва конструктив тарзда бўлишини таъминлаш, шунингдек, БМТнинг мустақил баҳолашларини ҳал қилиш мақсадида ўтказилишини эълон қилди.
Аввалроқ БМТнинг Афғонистондаги расмийлари ушбу йиғилиш мавзуларидан бири “Толибон” ҳукуматини тан олиш масаласини ўрганиш эканини айтган эди.
Ҳукуматнинг тан олиниши масаласи ҳар доим “Толибон”нинг халқаро йиғилишларда асосий талаби бўлиб келган, аммо “Толибон” ташқи ишлар вазири Амир Хон Мутаққий БМТнинг махсус координатори Ферейдон Синирлиўғли билан учрашувида ушбу йиғилишда иштирок этиш учун кун тартиби ҳақида батафсил маълумот олишни шарт қилиб қўйди.
“Толибон” ҳамма нарса олдиндан белгилаб қўйилган ва қарорлар олдиндан қабул қилинган вазиятда йиғилишда иштирок этишни истамаслигини маълум қилган.
Изоҳ (0)