Европа кенгаши раҳбари Шарль Мишель ёзги Европа сайловларида Бельгия либераллари вакили сифатида иштирок этиш ниятида эканини айтди. Бу ҳақда Deutsche Welle хабар берди.
“Мен 2024 йил июнь ойида Европарламентга сайланишга қарор қилдим”, — деди сиёсатчи.
Агар Мишель сайланса, у Европа Кенгаши раҳбари ва Европа парламентарийси лавозимини бирлаштира олмайди. Европарламентга сайловлар 6—9 июнь кунларига белгиланган ва Мишелнинг Европа Кенгаши раҳбари сифатидаги ваколати 2024 йилнинг ноябрида тугайди, шу боис у бу ўринни эрта тарк этадиган вазият юзага келиши мумкин.
Бу Венгрия бош вазири Виктор Орбан учун вақтинчалик Европа Кенгаши раҳбари лавозимини эгаллашда потенциал имкониятни очади, чунки Венгрия 2024 йилнинг июлидан декабригача Евроиттифоқ Кенгашига раислик қилиши керак. Бунинг олдини олиш учун Иттифоққа аъзо давлатлар раҳбарлари Мишель ўрнига номзод бўйича олдиндан келишиб олишлари керак.
Европа Иттифоқи сайловлари
2019 йилда Шарль Мишель Польша сиёсатчиси Дональд Туск ўрнига Европа кенгаши раиси лавозимини эгаллади.
“Европа Иттифоқи кенгаши раиси лавозими Лиссабон шартномасига мувофиқ, тахминан 15 йил аввал ташкил этилган”, — деб эслайди AFP.
Европа Кенгашининг амалдаги раҳбари Европа Иттифоқи саммитларини тайёрлаш ва ўтказиш учун масъул бўлиб, унда 27 давлат ва ҳукумат раҳбарлари учрашади. Кенгаш йиғилишлари одатда Брюсселда ўтказилади.
Европа сайловларида Европарламентнинг 720 нафар аъзоси беш йиллик муддатга сайланади. Бу дунёдаги энг йирик трансмиллий сайлов бўлиб, унда Европа Иттифоқининг 27 давлатидан 400 миллиондан ортиқ сайловчи иштирок этиши мумкин. Улар ўтказилгандан сўнг Европа Иттифоқи бошқарув органлари – Европа Кенгаши ва Европа Комиссияси раҳбарлари алмашади, унга ҳозир немис сиёсатчиси Урсула фон дер Ляен бошчилик қилмоқда.
Изоҳ (0)