Миннесотадаги Майо шаҳрида жойлашган клиниканинг шифокорлари электрон сигарета чекиш оқибатида касал бўлиб қолган беморларнинг ўпкасини биопсиядан ўтказиб, эпидемиянинг тарқалишига нима сабаб бўлганини тахмин қилди. Тадқиқот натижалари The New England Journal of Medicine журналида эълон қилинди.
Тиббиёт фанлари доктори, ўпка патологияси бўйича эксперт Брендон Ларсен ўпкаларнинг зарарланишига ва АҚШнинг турли штатларида вафот этган беморларнинг ўлимига вейпдан чиқадиган токсик газ ёки заҳарли кимёвий буғ сабаб бўлганини маълум қилмоқда. Тадқиқотчилар 17 нафар беморнинг ўпкасини ўрганиб, дастлабки тахминларда келтирилган липидлар — минерал ёғлар йўқлигини аниқлади.
Таъкидланишича, Майо клиникаси ўзининг икки ҳамда бошқа штатлардаги 15 нафар беморда биопсия ўтказган. Барча беморлар тадқиқотларни давом эттириш учун клиникага юборилган. Маълумотларга кўра, уларнинг 71 фоизи марихуана ёки наша ёғи мавжуд вейпларни чеккан.
Аввалроқ, электрон сигареталар ишлаб чиқариш билан шуғулланувчи Juul Labs компанияси раҳбари Кевин Бернс истеъфога чиққан эди. Бунга АҚШда электрон сигареталар оқибатида вафот этганлар сони 10 нафарга етгани сабаб бўлган.
Вейп чекувчиларнинг ўлими сабаб АҚШ ҳукумати мактаб ўқувчилари орасида урф бўлган аромотизатор қўшимчалар, ментол ва мева таъмли аралашмалар билан электрон сигареталар чекишни тақиқламоқчи.
Изоҳ (0)