Янги Зеландия парламенти 2009 йил 1 январь куни ва ундан кейин туғилган барча фуқароларга тамаки маҳсулотларини сотишни тақиқловчи қонунни маъқуллади, деб хабар бермоқда The Guardian. Таъкидланишича, у бундай қонунни қабул қилган биринчи мамлакатга айланди. Янги низом 2023 йил 1 январдан кучга киради.
Сигарета сотиб олиш учун минимал ёш аста-секинлик билан оширилади. Чунончи, 50 йилдан кейин сигарета сотиб олмоқчи бўлган шахс 63 ёшдан ошганини тасдиқловчи ҳужжатни тақдим этиши керак бўлади, деб ёзади Time.
Ушбу тақиқ билан бирга, тамаки истеъмолини камайтиришга қаратилган бошқа низомлар ҳам кучга киради. Хусусан, тамаки маҳсулотларида никотин миқдори кескин пасайтирилади, сигареталар эса ихтисослаштирилган дўконларда сотила бошлайди. Тамаки дўконларининг умумий сони ўн марта қисқариб, 6000 тадан 600 тагача камаяди. Шу билан бирга, янги тузатишлар вейплар савдосини чекламайди.
The Guardian келтирган маълумотларга кўра, Янги Зеландияда 2022 йил ноябрь ҳолатига, ҳар куни чекадиган одамлар сони ўтган йилдаги 9,4 фоиздан 8 фоизгача қисқарган, бу кузатувлар тарихидаги энг паст кўрсаткичдир. Шу билан бирга, вейп чекувчилар сони 6,2 фоиздан 8,3 фоизгача ошган.
Янги Зеландия ҳукумати давлатни 2025 йилгача «чекишдан холи» мамлакатга айлантиришга интилмоқда.
Изоҳ (0)