Шимолий Корея расмийлари 30 январь куни ядровий қурол олиб юришга қодир Hwasal-2 стратегик қанотли ракетасини учириш бўйича машғулотлар ўтказганини даъво қилмоқда. Бу ҳақда Жанубий Кореянинг Yonhap ахборот агентлиги хабар берди.
Расмий Пхеньяннинг қайд этишича, ракетанинг Сариқ денгиз йўналишида учирилиши “қўшни давлат хавфсизлигига салбий таъсир кўрсатмаган”.
Жанубий кореялик мутахассислар Шимолий Корея томони тақдим этган фотосуратларни таҳлил қилиб, Hwasal-2 (корейсча “ўқ”) паст баландликда учганини пайқашди.
Ракетанинг тўқ рангли корпусида оқ чизиқлар бўлган, бу илгари учирилган Hwasal-1 ракетасини эслатади.
Шимолий Корея Hwasal-1 ва Hwasal-2 қанотли ракеталарини илк бор 2021 йил сентябрь ва 2022 йил январь ойларида синовдан ўтказган эди. Бу вақтга келиб у яна бир нечта шундай ракеталарни учирди, улар мос равишда 1500 километр ва 2000 километр масофани босиб ўтишга қодир.
Қанотли ракетанинг учирилиши БМТ Хавфсизлик кенгашининг Шимолий Кореяга баллистик ракета технологиясидан фойдаланишни тақиқловчи бир қанча резолюцияларини бузмайди. Бироқ бу хавфсизликка жиддий таҳдид солиши мумкин, чунки бундай ракеталар ядро каллаклари билан жиҳозланиши мумкин.
Изоҳ (0)