Фавқулодда вазиятлар вазирлиги ижтимоий тармоқларда Tashkent City ҳудудидаги бинонинг 15-қаватидан одам қулаб тушгани ҳақида тарқалган хабарларга муносабат билдирди.
Қайд этилишича, 28 январь куни ФВВ Махсус вазифалар бўйича республика қутқарув маркази шахсий таркиби томонидан тегишли ташкилотлар билан ҳамкорликда фавқулодда вазиятларнинг олдини олиш, ёнғин хавфсизлигини таъминлаш ва содир бўлганда тўғри ҳаракат қилиш бўйича режавий махсус-тактик ўқув машқи ўтказилган.
“Унда жабрланганларни хавфсиз жойга олиб чиқиш, биринчи тиббий ёрдам кўрсатиш ҳамда ёнғинлар ва авария оқибатларини бартараф этиш бўйича амалий ҳаракатлар бажарилиб, ходимлар билим ва кўникмалари мустаҳкамланди. Махсус-тактик ўқув машқи давомида ҳеч ким жабрлангани йўқ”, — дейилади муносабатда.
Юқори қаватдан тушиб кетиш ҳолатлари
2022 йил июнь ойида Самарқанд шаҳридаги кўп қаватли бинонинг балкон қисмидан 1,5 ёшли қизча йиқилиб тушиб, вафот этганди. Шунингдек, Тошкентдаги кўп қаватли уйнинг 11-қаватидан 1,5 яшар бола тушиб кетгани ҳақида хабар қилинган эди. 2022 йил декабрда эса Россиянинг Санкт-Петербург шаҳри Петроградский туманида ўзбекистонлик ишчи 7-қаватдан тушиб кетиб, вафот этгани, шу йилнинг апрель ўрталарида эса Тошкент шаҳри Бектемир туманидаги 289-мактабда 11-синф ўқувчиси 3-қаватдан тушиб кетгани тўғрисида хабар берилганди.
Изоҳ (0)