“Жабрланувчилар тоғдек сўрамоқда”. “Док-1 Макс” судида товон пулларини аниқлаштириш учун суғуртачиларни таклиф қилиш сўралди 

Ўзбекистонда энг камида 68 нафар боланинг ўлимига сабабчи бўлган “Док-1 Макс” сиропи бўйича бошланган суднинг навбатдаги мажлисида жабрланувчилар товон пули учун миллиардлаб сўраётгани айтилиб, уларга тўланиши лозим бўлган товон пулининг миқдорини аниқлаштириш учун суғурта ходимларини судга таклиф қилиш сўралди. Бу ҳақда судда қатнашган “Дарё” журналисти маълумот берди. 

Суднинг 2024 йил 26 январь куни бўлиб ўтган навбатдаги мажлисида жабрланувчилардан бири боласининг ўлими учун 500 миллиард сўм миқдоридаги товон пулига даъво қилаётгани билдирилди. 

Адвокат Муҳсинжон Мадаминов судда сўз олиб, судлов ҳайъатига бир нечта илтимосномалари борлигини айтиб, дастлабки илтимоснома сифатида жабрланувчиларга тўланиши лозим бўлган товон пулига аниқлик киритиш учун суғурта ходимларини судга таклиф қилишни сўради. 

Кўряпмиз, ота-оналар миллиардлардан келяпти. Майли, жабрланувчиларнинг ўз тили билан айтганда, “тоғдек сўраб, қирдек бериш”, масаласига келадиган бўлсак, вафот этган шахснинг қиймати бўлмайди, лекин ўлим ҳолати бўлганда уларга товон пули тўланиши ҳуқуқий амалиётда бор. Қайси болага қанча пул тўланишига аниқлик киритиш учун Ўзбекистонда фаолият олиб борувчи энг камида 5 та суғурта ташкилотидан вафот этган, айнан шу ёшдаги болаларга 2022—2023 йилларда қанча товон пули тўланганига аниқлик киритишингизни сўрайман, — деди адвокат. 

Судья бу илтимосномани тинглар экан, нима учун айнан суғуртадан, деган саволни берди. “Чунки вафот этганларга қанча товон пули тўланаётгани ҳақидаги маълумот фақат суғуртада бўлади”, деди адвокат. 

Судлов ҳайъати раиси томонлар фикрини сўраб чиққач, суд жойида ажрим қилганини ва илтимосномани рад этганини маълум қилди. 

Судлов ҳайъати адвокатимиз илтимосномасини Жиноят-процессуал кодексининг 423-моддасидан келиб чиқиб, жойида ҳал этди. Ва илтимосномани қаноатлантирмасдан қолдирди. Сабабини тушунтираман. Суғурта учта ҳолат бўйича компенсация пули тўлайди. Техник шикаст, соғлиқ ва ҳаёт учун. Бу суғуртанинг тури шартномада кўрсатилган нархдан келиб чиқилади. Бунинг учун суғурта компанияси билан шартнома тузиш керак. Биздаги ҳолат бўйича шартнома йўқ. Бизда моддий зарар деганда шахс қанча муолажа олди, нимага дори олди, буни жабрланувчи судга тақдим этса, кўриб чиқамиз. Ҳозир тақдим этдими-йўқми, олдиндан фикримизни билдира олмаймиз. Биз бу бор ёки йўқлигига қараб, охирида фикримизни баён этиб ўтамиз, — деди судья илтимосномани рад этганига изоҳ берар экан. 

Судья Мусо Юсуповнинг айнан шу суд мажлисида ўқиб эшиттиришича, Наманган вилоятида яшовчи Нодирбек Носиров “Док-1 Макс” сиропидан вафот этган фарзанди, марҳум Мансурбек Носировнинг ўлими учун 500 миллиард сўм товон пули талаб қилмоқда. 

Эслатиб ўтамиз, аввалги суд мажлисларида жабрланувчилар талаб қилган товон пули миқдорининг энг кўпи 8 миллиард сўмгача чиққанди. 

“Док-1 Макс” сиропи сабаб гапиришдан, юришдан тўхтаган ва биринчи гуруҳ ногиронига айланган 5 ёшли Алибек Ўктамовнинг отаси Феруз Нуритдинов суднинг аввалги мажлисида фарзандини даволатиш учун айни кунга қадар 35 минг доллар харажат қилганини, боласи соғайиб кетиши учун яна 3 миллиард сўм компенсация сўрашини маълум қилганди. Бугунги судда у адвокат Ражабовнинг “нега судланувчилардан бу пулни талаб қиляпсиз?” дея айтган эътирозидан сўнг, фикрини ўзгартирганини, эндиликда 8 миллиард сўм сўрашини билдирди. Ва судьядан бу ҳақда расмий ҳужжатларга ёзиб қўйишини илтимос қилди.