Мотивация борасидаги барча роман ва китобларни битта қолдирмай ўқиб чиққан ва мутолаа қилиш учун яна нимадир қидираётган бўлсангиз, ушбу тавсияларимиз сиз учун. Шу тобда чой ёки қаҳвани аччиқроқ дамлаб, иссиқ кийим ва шарфларга ўраниб олганингиз маъқул. Машҳурлар севимли китоблари ҳақидаги таассуротларини сиз билан мамнуният ила ўртоқлашади.
Қуйида жавонингиздан ўрин олишга муносиб бўлган китоблар билан танишасиз. Энг яхши асарларни Крис Пратт, Анжелина Жоли, Жонни Депп ва бошқаларнинг номидан келтирамиз.
“Булбул”, Кристин Ҳанна
Тhе New York Times талқини бўйича биринчи рақамли бесцеллер. Унда Иккинчи жаҳон уруши вақтида яшаган аёлларнинг ҳаёти батафсил тасвирланган. Дарвоқе, шу йил уруш, қурбонлар, азоб ва буюк дўстлик ҳақидаги асарни катта экранларга чиқариш режалаштирилган.
Таниқли қўшиқчи Тим МакГроу ушбу бадиият намунасининг машҳур мухлисларидан бири ҳисобланади. У америкалик журналист Женна Буш Ҳагерга асар ҳақида шундай деган эди: “Бу менинг севимли китобларимдан бири. Уни ўқиб бўлгач, ёш боладек йиғладим. Фарзандларим, хотиним уни ўқиб чиқишди. Улар ҳам бу китобни ёқтириб қолди”.
“Терминаллар рўйхати”, Жек Карр
Крис Пратт “Терминаллар рўйхати” романидан илҳомланган сиёсий триллер руҳидаги сериалда рол ижро этади. Асар собиқ денгизчи Жек Карр томонидан ёзилган. Китоб ҳарбий хизматчи ҳақида ҳикоя қилади. У бутун экипажининг ўлими ортида Америка ҳукумати турганини билади. Крисга ушбу асар жуда манзур бўлган ва унинг экранлаштирилишида иштирок этаётганидан хурсанд бўлса керак.
“Бизга кўринмайдиган ҳамма ёруғлик”, Энтони Дорр
Америкалик комик актёр ва телебошловчи Сет Мейерс бу романнинг таниқли мухлисларидан. Иккинчи жаҳон уруши воқеаларига бағишланган мазкур китоб Пулитцер мукофотига сазовор бўлган. Китоб сюжети икки норасида — уруш вайронагарчиликларидан омон қолишга астойдил ҳаракат қилаётган кўр француз қизи ва немис боласи атрофида қурилади.
Агар сиз бу китобни ўқимаган бўлсангиз, ҳозир мутолаанинг айни пайти. У кўплаб қисқа боблардан иборат ажойиб асар.
Сиз шунча ишдан ортиб бу китобни қандай ўқишим мумкин, деб ўйлаётган бўлсангиз, шуни билингки, ўн дақиқа вақт ажратиб, мутолаага киришсангиз, бир-икки бобни қандай ўқиб бўлганингизни сезмай қоласиз”, — деб ёзади Мейерс Instagram саҳифасида.
“Дракула”, Брем Стокер
Машҳур Влад Дракулага ташриф буюрган ёш агент Жонатан Харкернинг саргузаштлари кўпчиликка маълум. Агар кимдир унутган бўлса, эслатиб қўймоқчимиз. Роман воқеалари кўплаб хатлар, қайдлар ва газетадан қирқиб олинган парчалардан иборат.
Саҳифалар Стокер қаҳрамонларининг саргузаштлари, уларнинг ўй-кечинмалари билан тўлдирилган. Кўчмас мулк агенти бўлиб ишлайдиган ёш йигит Жонатан Харкер Трансилванияга саёҳат қилади. У Англияда уй сотиб олиш тўғрисида бир граф билан олди-сотди шартномасини тузиши керак. Ўша таҳликали лаҳзадан, яъни фойтун йигитчани граф дарвозаси олдига олиб келганидан сирли воқеалар бошланади.
Машҳур актриса Анжелина Жоли ҳам ирландиялик адибнинг ижодини қадрлайди. Актрисанинг сўзларига кўра, китобнинг сюжети “аёллар озодлиги қўрқувини акс эттиради”. Маълумки, актрисанинг шахсий жамғармаси вампирлар ҳақидаги ҳикоялар билан тўла.
“Йўлда”, Жек Керуак
Жонни Деппнинг ўзи жуда ғайриоддий шахс ва унинг севимли китоблар танлови ҳам ўзига хос. Актёр Кафканинг “Эврилиш” романи ва Боб Диланнинг “Бий” (ўргимчак тури) асарини яхши кўради. Жек читтак образи билан танилган санъаткор Эдгар Аллан Понинг ҳикоялари ва романларини севиб мутолаа қилади. Аммо Жек Керуакнинг “Йўлда” автобиографик романи унинг китоблари рўйхатида олдинги ўринни эгаллайди. Асар қўлёзмаси бир неча бор кескин изоҳларга дучор бўлган ва ноширлар томонидан аёвсиз танқид қилинган. Сюжетга кўра, китоб беш қисмга бўлинган ва унда икки дўст — Сал Парадайз ва Дин Мориартининг АҚШ ва Мексика бўйлаб саёҳатлари ҳақида ҳикоя қилинади.
Изоҳ (0)