Motivatsiya borasidagi barcha roman va kitoblarni bitta qoldirmay o‘qib chiqqan va mutolaa qilish uchun yana nimadir qidirayotgan bo‘lsangiz, ushbu tavsiyalarimiz siz uchun. Shu tobda choy yoki qahvani achchiqroq damlab, issiq kiyim va sharflarga o‘ranib olganingiz maʼqul. Mashhurlar sevimli kitoblari haqidagi taassurotlarini siz bilan mamnuniyat ila o‘rtoqlashadi.
Quyida javoningizdan o‘rin olishga munosib bo‘lgan kitoblar bilan tanishasiz. Eng yaxshi asarlarni Kris Pratt, Anjelina Joli, Jonni Depp va boshqalarning nomidan keltiramiz.
“Bulbul”, Kristin Hanna
The New York Times talqini bo‘yicha birinchi raqamli bestseller. Unda Ikkinchi jahon urushi vaqtida yashagan ayollarning hayoti batafsil tasvirlangan. Darvoqe, shu yil urush, qurbonlar, azob va buyuk do‘stlik haqidagi asarni katta ekranlarga chiqarish rejalashtirilgan.
Taniqli qo‘shiqchi Tim MakGrou ushbu badiiyat namunasining mashhur muxlislaridan biri hisoblanadi. U amerikalik jurnalist Jenna Bush Hagerga asar haqida shunday degan edi: “Bu mening sevimli kitoblarimdan biri. Uni o‘qib bo‘lgach, yosh boladek yig‘ladim. Farzandlarim, xotinim uni o‘qib chiqishdi. Ular ham bu kitobni yoqtirib qoldi”.
“Terminallar ro‘yxati”, Jek Karr
Kris Pratt “Terminallar ro‘yxati” romanidan ilhomlangan siyosiy triller ruhidagi serialda rol ijro etadi. Asar sobiq dengizchi Jek Karr tomonidan yozilgan. Kitob harbiy xizmatchi haqida hikoya qiladi. U butun ekipajining o‘limi ortida Amerika hukumati turganini biladi. Krisga ushbu asar juda manzur bo‘lgan va uning ekranlashtirilishida ishtirok etayotganidan xursand bo‘lsa kerak.
“Bizga ko‘rinmaydigan hamma yorug‘lik”, Entoni Dorr
Amerikalik komik aktyor va teleboshlovchi Set Meyers bu romanning taniqli muxlislaridan. Ikkinchi jahon urushi voqealariga bag‘ishlangan mazkur kitob Pulitser mukofotiga sazovor bo‘lgan. Kitob sujeti ikki norasida — urush vayronagarchiliklaridan omon qolishga astoydil harakat qilayotgan ko‘r fransuz qizi va nemis bolasi atrofida quriladi.
Agar siz bu kitobni o‘qimagan bo‘lsangiz, hozir mutolaaning ayni payti. U ko‘plab qisqa boblardan iborat ajoyib asar.
Siz shuncha ishdan ortib bu kitobni qanday o‘qishim mumkin, deb o‘ylayotgan bo‘lsangiz, shuni bilingki, o‘n daqiqa vaqt ajratib, mutolaaga kirishsangiz, bir-ikki bobni qanday o‘qib bo‘lganingizni sezmay qolasiz”, — deb yozadi Meyers Instagram sahifasida.
“Drakula”, Brem Stoker
Mashhur Vlad Drakulaga tashrif buyurgan yosh agent Jonatan Xarkerning sarguzashtlari ko‘pchilikka maʼlum. Agar kimdir unutgan bo‘lsa, eslatib qo‘ymoqchimiz. Roman voqealari ko‘plab xatlar, qaydlar va gazetadan qirqib olingan parchalardan iborat.
Sahifalar Stoker qahramonlarining sarguzashtlari, ularning o‘y-kechinmalari bilan to‘ldirilgan. Ko‘chmas mulk agenti bo‘lib ishlaydigan yosh yigit Jonatan Xarker Transilvaniyaga sayohat qiladi. U Angliyada uy sotib olish to‘g‘risida bir graf bilan oldi-sotdi shartnomasini tuzishi kerak. O‘sha tahlikali lahzadan, yaʼni foytun yigitchani graf darvozasi oldiga olib kelganidan sirli voqealar boshlanadi.
Mashhur aktrisa Anjelina Joli ham irlandiyalik adibning ijodini qadrlaydi. Aktrisaning so‘zlariga ko‘ra, kitobning syujeti “ayollar ozodligi qo‘rquvini aks ettiradi”. Maʼlumki, aktrisaning shaxsiy jamg‘armasi vampirlar haqidagi hikoyalar bilan to‘la.
“Yo‘lda”, Jek Keruak
Jonni Deppning o‘zi juda g‘ayrioddiy shaxs va uning sevimli kitoblar tanlovi ham o‘ziga xos. Aktyor Kafkaning “Evrilish” romani va Bob Dilanning “Biy” (o‘rgimchak turi) asarini yaxshi ko‘radi. Jek chittak obrazi bilan tanilgan sanʼatkor Edgar Allan Poning hikoyalari va romanlarini sevib mutolaa qiladi. Ammo Jek Keruakning “Yo‘lda” avtobiografik romani uning kitoblari ro‘yxatida oldingi o‘rinni egallaydi. Asar qo‘lyozmasi bir necha bor keskin izohlarga duchor bo‘lgan va noshirlar tomonidan ayovsiz tanqid qilingan. Syujetga ko‘ra, kitob besh qismga bo‘lingan va unda ikki do‘st — Sal Paradayz va Din Moriartining AQSH va Meksika bo‘ylab sayohatlari haqida hikoya qilinadi.
Izoh (0)