Туркия президенти Ражаб Тоййиб Эрдўғон Швециянинг НАТОга қабул қилиниши ҳақидаги протоколни тасдиқлади. Ҳужжат ҳукуматнинг Resmi Gazete газетасида эълон қилинди, деб ёзмоқда Anadolu.
23 январь куни Туркия парламенти протоколни ратификация қилиш учун овоз берганди.
Венгрия Швециянинг альянсга қўшилиш аризасини ҳали ратификация қилмаган НАТОга аъзо ягона давлат бўлиб қолмоқда. НАТОга кириш учун номзод давлатнинг аризаси альянснинг барча аъзолари томонидан маъқулланиши керак.
Швеция Финляндия билан бирга 2022 йилнинг ёзида НАТОга аъзо бўлиш учун ариза топширганди. Мамлакатлар Россия қўшинларининг Украинага кенг кўламли босқини фонида шундай қарорга келди.
Финляндия 2023 йил апрель ойида НАТОга аъзо бўлди. Швециянинг НАТОга кириши Туркиянинг мамлакатни Курдистон ишчилар партияси (Анқара уни “террорчи ташкилот” деб ҳисоблайди) аъзоларига бошпана берганликда айбловчи қаршиликлари туфайли кечиктирилди.
Изоҳ (0)