Россия армиясининг Украинада уруш олиб боришга ёрдам берадиган технологияларни қўлга киритишига йўл қўймаслик учун қўйилган чекловларга қарамай, Россия ўтган йили 1 миллиард долларлик замонавий Америка ва Европа чипларини импорт қилди. Бу ҳақда Bloomberg Россия божхона маълумотларига таяниб хабар берди.
Агентлик маълум қилишича, ҳарбий техника, жумладан, танклар ва ракеталар ишлаб чиқаришда қўлланиши мумкин бўлган импорт чиплари Американинг Intel Corp, Advanced Micro Devices (АМD) ва Analog Devices Inc., шунингдек, Infineon Technologies АG, STMicroelectronics NV ва NXP Semiconductors NV Европа компаниялари томонидан ишлаб чиқарилган.
Россия томонидан сотиб олинган чип ишлаб чиқарувчилари орасида бир нечта Хитой компаниялари, шунингдек, Тайваннинг Реалтек Семиcондуcтор компанияси бор. Bloomberg таъкидлашича, бу компанияларнинг барчаси санкциялар қонунчилигини бузгани ва технологияни Россияга экспорт қилгани ҳақида ҳеч қандай далил йўқ. Агентликнинг эслатишича, санкцияланган технологияларнинг аксарияти учинчи давлатлар, жумладан, Хитой, Туркия ва БАА орқали Россияга етиб боради.
Ғарб компаниялари санкцияларни бузганини рад этмоқда
Маҳсулотлари Россияга кирган Америка ва Европа компаниялари санкциялар талабларига тўлиқ риоя қилганини ва 2022 йил февралида Россия қўшинларининг Украинага ҳужумидан кейин Россия Федерациясидаги фаолиятини тўхтатганини маълум қилди.
Июль ойида “Верстка” нашри божхона маълумотларига таяниб, биргина 2023 йилнинг биринчи олти ойида Американинг Интел ва АМД маҳсулотлари, жумладан, микропроцессорлари Россияга мос равишда 169 миллион доллар ва 35 миллион доллардан ортиқ миқдорда импорт қилингани ҳақида хабар берган эди. Умуман олганда, нашрнинг ҳисоб-китобларига кўра, олти ой давомида Россия федерациясига ғарб компанияларининг қиймати 502 миллион доллардан ортиқ чиплари импорт қилинган.
Изоҳ (0)