Ўзбекистон Камбағалликни қисқартириш ва бандлик вазирлиги ҳузуридаги Ташқи меҳнат миграцияси агентлиги Россия ҳуқуқ-тартибот идоралари томонидан Екатеринбургдаги қурилиш майдончасида меҳнат муҳожирлари ўрдаксимон юришга мажбурланган рейд билан боғлиқ вазиятга изоҳ берди.
Рейд 17 январь куни бўлиб ўтган. Тадбир давомида прокуратура, ФХХ, Миграция ва Ички ишлар вазирликлари, шунингдек, Россия Миллий гвардияси ходимлари томонидан 150 киши — Марказий Осиё давлатлари фуқаролари текширилган. Улардан саккиз нафари иммиграция қонунчилигини бузган ва депортация қилиниши керак. Россия фуқаролигига эга бўлган, аммо ҳарбий хизматда рўйхатдан ўтмаган тўрт кишига чақирув қоғози берилган.
Агентликнинг аниқлик киритишича, қўлга олинганлар орасида икки нафар Ўзбекистон фуқароси ҳам бор. Иш патенти йўқлиги сабабли улар суд қарори билан Екатеринбургдаги чет эл фуқароларини вақтинча сақлаш ҳибсхонасига жойлаштирилган.
Ҳибсга олинган ўзбекистонликларнинг айтишича, қурилиш майдончасида хавфсизлик кучлари пайдо бўлганида кўплаб ишчилар қочишга уринган ва қўлга олинган. Кейин улар ўтирган ҳолда юришга мажбурланган.
Ўзбекистон Миграция агентлиги матбуот котиби ўрдаксимон юришга мажбурланганлар орасида ўзбекистонликлар бўлмаганини таъкидлади.
Вазият Ўзбекистоннинг Екатеринбургдаги Бош консулхонаси ва Ташқи меҳнат миграцияси агентлигининг Россиядаги ваколатхонаси томонидан назоратга олинди, ватандошларга ҳуқуқий ва бошқа ёрдам кўрсатилмоқда, дейилади Ташқи меҳнат миграцияси хабарида.
Ўзбекистон Омбудсмани Феруза Эшматова Россия Омбудсмани Татьяна Москалковага Екатеринбургда меҳнат муҳожирларининг таҳқирланиши юзасидан мурожаат қилди.
Аввалроқ Қирғизистон Ташқи ишлар вазирлиги муҳожирларни ўтириб юришга мажбурлаган хавфсизлик ходимларини текширишни талаб қилганди.
Қурилиш майдончасида ишлаётганлар орасида Қирғизистоннинг 40 га яқин фуқароси бўлган, улардан уч нафари ўрдаксимон юришга мажбурланганлар қаторида суратда кўриниш берган.
Изоҳ (0)