Польша собиқ ички ишлар вазири Мариуш Каминский ва унинг ўринбосари Мацэй Вонсик афв этилганидан сўнг қамоқдан озод этилди, деб хабар бермоқда RMF24.
Каминский Радом шаҳрида, Вонсик эса Пшитулах Старда ҳибсда сақланаётган эди.
Ўтган кеча Польша президенти Анжей Дуда Каминский ва Вонсиклар афв этилгани ҳақида эълон қилганди.
“Жаноб Камински ва Вонсик афв этилди. Мен буни чин дилдан тасдиқлайман. Адлия вазири ва Бош прокурорга ушбу масалани зудлик билан ҳал этишни сўраб мурожаат қиламан. Зудлик билан ҳужжатларни қайта кўриб чиқиш учун юборамиз. Мен президент қарорини дарҳол амалга оширишга ва шу муносабат билан уларни зудлик билан қамоқдан озод қилишга чақираман”,— деди Дуда ҳамда улар “гуманитар, инсонийлик ва давлатга оид сабабларга кўра” озод этилганини қўшимча қилди.
Қамоқдан чиққанидан кейин Каминский сиёсий фаолиятини давом эттиришга ваъда берди.
“Бу кураш давом этмоқда. Бу узоқ йўл, оғир йўл бўлиши мумкин, лекин биз албатта ғалаба қозонамиз”, — деб таъкидлади собиқ вазир. “Жаноб Туск (бош вазир), жаноб Головния (Польша Сейми спикери), биз тез орада кўришамиз”.
Шундан сўнг, ИИВнинг собиқ раҳбари машинага ўтириб, жўнаб кетган.
Каминский ва унинг ўринбосари декабрь ойида 2015 йилги иш бўйича (Марказий аксилкоррупция бюросини бошқарган вақтида мансаб ваколатларини суиистеъмол қилгани учун) икки йиллик қамоқ жазосига ҳукм қилинган эди. Январь ойида улар Варшавадаги президент саройига меҳмон сифатида келганида ҳибсга олинди. Қамоқхонада собиқ вазир очлик эълон қилди.
Изоҳ (0)