O‘zbekiston Kambag‘allikni qisqartirish va bandlik vazirligi huzuridagi Tashqi mehnat migratsiyasi agentligi Rossiya huquq-tartibot idoralari tomonidan Yekaterinburgdagi qurilish maydonchasida mehnat muhojirlari o‘rdaksimon yurishga majburlangan reyd bilan bog‘liq vaziyatga izoh berdi.
Reyd 17-yanvar kuni bo‘lib o‘tgan. Tadbir davomida prokuratura, FXX, Migratsiya va Ichki ishlar vazirliklari, shuningdek, Rossiya Milliy gvardiyasi xodimlari tomonidan 150 kishi — Markaziy Osiyo davlatlari fuqarolari tekshirilgan. Ulardan sakkiz nafari immigratsiya qonunchiligini buzgan va deportatsiya qilinishi kerak. Rossiya fuqaroligiga ega bo‘lgan, ammo harbiy xizmatda ro‘yxatdan o‘tmagan to‘rt kishiga chaqiruv qog‘ozi berilgan.
Agentlikning aniqlik kiritishicha, qo‘lga olinganlar orasida ikki nafar O‘zbekiston fuqarosi ham bor. Ish patenti yo‘qligi sababli ular sud qarori bilan Yekaterinburgdagi chet el fuqarolarini vaqtincha saqlash hibsxonasiga joylashtirilgan.
Hibsga olingan o‘zbekistonliklarning aytishicha, qurilish maydonchasida xavfsizlik kuchlari paydo bo‘lganida ko‘plab ishchilar qochishga uringan va qo‘lga olingan. Keyin ular o‘tirgan holda yurishga majburlangan.
O‘zbekiston Migratsiya agentligi matbuot kotibi o‘rdaksimon yurishga majburlanganlar orasida o‘zbekistonliklar bo‘lmaganini ta’kidladi.
Vaziyat O‘zbekistonning Yekaterinburgdagi Bosh konsulxonasi va Tashqi mehnat migratsiyasi agentligining Rossiyadagi vakolatxonasi tomonidan nazoratga olindi, vatandoshlarga huquqiy va boshqa yordam ko‘rsatilmoqda, deyiladi Tashqi mehnat migratsiyasi xabarida.
O‘zbekiston Ombudsmani Feruza Eshmatova Rossiya Ombudsmani Tatyana Moskalkovaga Yekaterinburgda mehnat muhojirlarining tahqirlanishi yuzasidan murojaat qildi.
Avvalroq Qirg‘iziston Tashqi ishlar vazirligi muhojirlarni o‘tirib yurishga majburlagan xavfsizlik xodimlarini tekshirishni talab qilgandi.
Qurilish maydonchasida ishlayotganlar orasida Qirg‘izistonning 40 ga yaqin fuqarosi bo‘lgan, ulardan uch nafari o‘rdaksimon yurishga majburlanganlar qatorida suratda ko‘rinish bergan.
Izoh (0)