АҚШ ва Буюк Британия Ямандаги ҳусийлар базаларига янги ҳужум уюштирди. Бу сафар яна тўрт давлат жумладан мусулмон Баҳрайн Америка ва Британия ҳарбийларига ёрдам кўрсатди.
Тhе Guardian нашрининг ёзишича, АҚШ ва Буюк Британия 23 январга ўтар кечаси маҳаллий вақт билан ярим тунда Ямандаги ҳусийлар базаларига янги ҳужумлар уюштирган. Икки давлат мудофаа вазирликларининг қўшма баёнотига кўра, бу ҳусийларнинг Қизил денгиздаги савдо кемаларига қарши давом этаётган ҳужумларига “мутаносиб ва зарур” жавоб бўлган.
АҚШ ва Буюк Британия ҳусийларга тегишли саккизта нишонга зарба берди. Улар бошқа тўртта давлатдан: Австралия, Канада, Нидерландия ва Баҳрайндан ёрдам олди (тахминларга кўра, разведка шаклида). Ҳужумдан олдин АҚШ президенти Жо Байден ва Буюк Британия бош вазири Риши Сунак ўртасида телефон орқали суҳбатлар бўлиб ўтган.
Зарбалар қирувчи самолётлар ва баллистик ракеталар ёрдамида ҳаво ва денгиздан амалга оширилди. Ракеталарнинг бир қисми Яманнинг ҳусийлар назорати остидаги пойтахти Санадаги нишонларга тегди. Нишонлар қаторига ҳусийларнинг ракета учириш пунктлари, радарлар, қурол ва ўқ-дори омборлари (шу жумладан ерости омборлари) киритилган. Буюк Британия Мудофаа вазирлиги Сана аэропорти яқинига зарбалар берилганини тасдиқлади. Ҳалок бўлганлар ва жароҳатланганлар ҳақида ҳозирча маълумот йўқ.
Ҳусийлар, ўз навбатида, жавоб ҳужумлари билан таҳдид қилди ва “АҚШ—Британия тажовузлари Яман халқининг Ғазо секторидаги мазлум аҳолига нисбатан маънавий ва инсоний мажбуриятларини бажаришдаги қатъиятини янада кучайтиради”, деб таъкидлади.
Эслатиб ўтамиз, 19 декабрь куни Вашингтон Қизил денгизда тўсиқларсиз ва хавфсиз навигацияни таъминлашдан иборат бўлган “Фаровонлик қўриқчиси” операциясини эълон қилди. 12 январь куни АҚШ ва Буюк Британия халқаро коалиция кўмагида ядровий сувости кемасидан учирилган самолётлар ва “Тоmahawk” қанотли ракеталари ёрдамида Ямандаги ҳусий нишонларига ҳужум қилди. Шундан кейин ҳусийларга яна саккиз марта зарба берилди.
Изоҳ (0)