Украина мудофаа вазири Рустам Умеров Россия бугунгидай ракета ҳужумини такрорлаши учун етарли ракеталар захирасига эгалигини айтди. У бу ҳақда Facebook’даги саҳифасида маълум қилди.
Умеров мамлакат ҳудудига қилинган ракета ҳужумига изоҳ бериб, уни бутун урушдаги энг оммавий ҳужум деб атади.
“Кўп ойлар давомида руслар айнан шу мақсадда: турар-жой бинолари, савдо марказлари, касалхоналарга ҳужум қилиш учун ракеталарни тўплади. Украина тинч шаҳарларига зарба бериш. Руслар фуқароларимизни ўлдирди ва ярадор қилди, инфратузилмани вайрон қилди. Россия яна ва яна бутун дунёга украиналикларни геноцид қилишдан, террордан, қотилликдан бошқа мақсади йўқлигини намойиш этмоқда. Бу жиноятларнинг ҳар бири адолатли жазоланади.
Кўриниб турибдики, тажовузкор давлатда мавжуд бўлган бундай ракета захиралари билан улар бундай ҳужумларни давом эттириши мумкин ва давом этади”, — деди Украина мудофаа вазири.
Ўз навбатида, Умеров ҳамкор давлатлар ҳукуматлари билан Украинани ҳаво мудофаа тизимлари билан таъминлаш бўйича музокаралар олиб борилаётганини айтди. Мудофаа вазири Россия ҳужумини қайтарган Украина ҳаво ҳужумидан мудофаа кучларига миннатдорлик билдирди.
Изоҳ (0)