11 декабрга ўтар кечаси Россия қўшинлари Украина ҳудудига баллистик ракеталар ва камикадзе дронлари билан ҳужум қилди, деб хабар бермоқда Украина Қуролли кучлари Ҳарбий ҳаво кучлари қўмондонлиги.
Украина ҳарбийларининг ҳисобига кўра, баллистик ракеталар Киевга Брянск вилояти ҳудудидан учирилган. Саккизта ракетанинг барчаси ҳаво мудофааси томонидан уриб туширилган.
“Бироқ ракета қолдиқларининг келиб тушиши ердаги вайронагарчилик ва ёнғинларга сабаб бўлди, улар тезда бартараф этилди”, — деди шаҳар мэри Виталий Кличко. Унинг қўшимча қилишича, Дарницкий туманида тўрт киши жабрланган, шифокорлар уларга жойида зарур ёрдам кўрсатган.
Украина Қуролли Кучлари Ҳарбий-ҳаво кучлари қўмондонлиги маълумотларига кўра, Россия қўшинлари томонидан учирилган 18 та камикадзе дронларнинг барчаси муваффақиятли уриб туширилган. Украина ҳарбийлари учувчисиз учоқлар асосан Николаев вилоятида йўқ қилинганини айтди.
Россия қўшинлари деярли ҳар куни Украина ҳудудига камикадзе дронлари ва турли синфдаги ракеталар билан ҳужум қилмоқда.
Буюк Британия Мудофаа вазирлиги урушни кузатиш бўйича 10 декабрь кунги ҳисоботида Россия қўшинлари Украинанинг энергетика инфратузилмасини йўқ қилишга қаратилган янги компания бошлаганини тахмин қилди.
Изоҳ (0)