Россия ташқи ишлар вазири Сергей Лавров CBS Неwс телеканалига берган интервьюсида АҚШ йиллар давомида Россия президенти Владимир Путиннинг “хайрихоҳлик намойишларини” эътиборсиз қолдириб келганини айтди.
Вазирнинг таъкидлашича, Москва ва Вашингтон ўртасидаги муносабатлар узоқ вақт давомида дўстона бўлиб келган, бироқ АҚШнинг 43-президенти Жорж Буш даврида ўзаро ишонч йўқола бошлаган.
Путин президентлигининг дастлабки икки муддатида кўрсатган улкан хайрихоҳлик эътиборга олинмади. У (кичик Буш) оддийгина қилиб: “Яхши, бу йигит жуда яхши, уни чўнтагимизда сақлаймиз” деган, — иддао қилди Лавров.
Унинг сўзларига кўра, АҚШ сиёсатчилари Вашингтон СССР парчаланганидан кейин олиб борган “номақбул сиёсат”дан заррача ҳам сабоқ олмаган. Лавров Ғарб давлатларининг Совет Иттифоқи Коммунистик партияси марказий қўмитаси собиқ бош котиби ва СССР биринчи президенти Михаил Горбачёвга берилган НАТОни кенгайтирмаслик ҳақидаги ваъдасини эслатиб ўтди ҳамда Москва кенгайишнинг эҳтимолий оқибатлари ҳақида бир неча бор огоҳлантирганини таъкидлади.
Биз чиндан ҳам адолатдан, шу жумладан, Россия ва Украина муносабатларидаги адолатдан манфаатдор бўлган ҳар бир кишини тинглашга тайёрмиз. Бу, албатта, Украинадан Россияга қарши уруш қуроли сифатида фойдаланишга қаратилган Ғарб сиёсатига чек қўйишни ўз ичига олади, — деб таъкидлади вазир.
2017 йилда америкалик режиссёр Оливер Стоунга берган интервьюсида Путин АҚШнинг собиқ президенти Билл Клинтон (2001 йилгача давлат раҳбари бўлган) билан сўнгги учрашувларидан бирида Россиянинг НАТОга кириш вариантини кўриб чиқишни таклиф қилганини айтганди. Россия раҳбарининг сўзларига кўра, Клинтон бунга қарши эмасди, аммо бутун Америка делегацияси “асабийлашган”. Стоуннинг Россия томони альянсга кириш учун ариза берганми, деган саволига жавобан Путин кулиб юборди.
2022 йил май ойида АҚШ давлат котиби Энтони Блинкен Россиянинг ўзи 90 йилларда НАТОга кириш ғоясидан воз кечганини айтди.
Изоҳ (0)