Ўзбекистон президенти 23—25 январь кунлари давлат ташрифи билан Хитойда бўлиши ҳақида хабар қилинган эди. Ташриф арафасида Хитойнинг Жэньминь жибао нашрида Шавкат Мирзиёев муаллифлигидаги “Ўзбекистон—Хитой: минг йиллар давомидаги дўстлик ва ҳамкорлик” номли мақола эълон қилинди. Унда икки давлат муносабатлари ҳақида сўз боради.
“Янги йилда биринчи ташрифимни Хитой Халқ Республикаси ҳурматли раиси Си Цзиньпиннинг таклифига биноан ушбу давлатга амалга оширишим чуқур рамзий маънога эгадир.
Хитойга ҳар сафар ташриф буюрганимда бу ерда амалга оширилаётган ислоҳотлар кўлами ва эришилган муваффақиятлар, ўзининг кўп асрлик орузусини рўёбга чиқариш учун тараққиёт йўлидан дадил қадам ташлаб бораётган Хитой халқининг бунёдкорлик кучи, меҳнатсеварлиги ва истеъдодига чин дилдан қойил қоламан.
Сўнгги ўн йил ичида Хитой Халқ Республикаси қудратли жаҳон давлатига айланди, улкан илмий-техникавий ва инновацион тараққиётга эришди, иқтисодиёт ва бизнесни ривожлантириш учун ноёб экотизим яратди”, — дейди Шавкат Мирзиёев.
Давлат раҳбарининг қайд этишича, ХХР савдо ва сармоявий ҳамкорликни кенгайтириш ва инфратузилмавий лойиҳаларни амалга ошириш орқали ривожланаётган мамлакатларнинг иқтисодий ўсишини қўллаб-қувватлашда иштирок этмоқда.
Ўзбекистон Хитойнинг дўстона қўшниси ва ҳар томонлама стратегик ҳамкори сифатида бу муваффақиятлардан чин дилдан мамнун.
Президентнинг таъкидлашича, Ўзбекистон ва Хитой икки мамлакат туб манфаатларига дахлдор бўлган давлат суверенитети, ҳудудий яхлитлиги, яхши қўшничилик тамойилларига содиқлик, ўз тараққиёт йўли ва маданий-цивилизациявий ўзлигини ҳурмат қилиш каби масалаларда бир-бирини қатъий қўллаб-қувватлайди.
“Хитой билан кўп қиррали муносабатларни ривожлантириш Ўзбекистон ташқи сиёсатининг асосий устувор йўналишларидан бири бўлган ва шундай бўлиб қолади”, — дейди Шавкат Мирзиёев.
Айни пайтда Ўзбекистон ва Хитой ўртасидаги савдо-иқтисодий ва сармоявий ҳамкорлик изчил ривожланмоқда. Юқори технологиялар, муқобил энергетика, кимё, машинасозлик, металлургия, электротехника, инфратузилмани модернизация қилиш ва бошқа соҳаларда қатор йирик қўшма сармоявий лойиҳалар амалга оширилмоқда.
Яқин келажакда Ўзбекистонда хитойлик ҳамкорлар иштирокида сув, электр энергетика, автомобиль ва темирйўл соҳаларида йирик инфратузилма лойиҳаларини амалга ошириш бўйича узоқ муддатли дастурни тасдиқлаш режалаштирилган.
Ўзбекистон Хитойнинг глобал бирлаштирувчи кучга айланган “Бир макон, бир йўл” ташаббусини амалга ошириш доирасида турли дастурларда ҳам фаол иштирок этмоқда.
“Жаҳон сиёсатидаги беқарорлик ва нотинчликка қарамай, биз келажакка дадил назар ташлаб, биргаликдаги бунёдкорлик режаларини тузамиз. Хитой Халқ Республикасининг ҳурматли раиси Си Цзиньпин билан бўлажак учрашувда айнан шу ҳақда гаплашамиз”, — деган Шавкат Мирзиёев.
Давлат раҳбари келгуси ўн йилликларга мўлжалланган кўп қиррали ҳамкорликнинг асосий вазифаларини амалга ошириш бўйича янги узоқ муддатли кун тартиби ва истиқболли дастурларни ишлаб чиқишни муҳим деб ҳисоблайди.
Изоҳ (0)