Пекинда Ўзбекистон ташқи ишлар вазири Бахтиёр Саидов ва Хитой ташқи ишлар вазири Ван И икки давлат ташқи ишлар вазирларининг биринчи стратегик мулоқотини ўтказди. Бу ҳақда Ўзбекистон ТИВ раҳбари ўзининг Telegram’даги каналига ёзиб қолдирди.
Тадбир кун тартиби сиёсатдан иқтисодиётгача қатор соҳалардаги ҳамкорлик масалаларини қамради. Олий даражада эришилган келишувларни тўлиқ амалга ошириш, иқтисодий дипломатияни сезиларли натижалар билан бойитишга алоҳида эътибор қаратдик. Барча йўналишларда алоқаларимизни янада чуқурлаштириш учун зарур саъй-ҳаракатларни сафарбар этишга тайёрмиз, — дейди Бахтиёр Саидов.
Sinxua агентлигининг ёзишича, Ван И Хитой ва Ўзбекистон “муштарак тақдирга эга дўст қўшнилар” эканини таъкидлаган. У ХХР Ўзбекистон билан биргаликда ўзаро манфаатли ҳамкорликни ривожлантириш мақсадида икки мамлакат ташқи ишлар вазирлари ўртасидаги янги стратегик мулоқот платформасидан тўлиқ фойдаланишга тайёрлигини билдирган.
Иккала томон ҳам БМТ, ШҲТ ва бошқа тузилмалар доирасида мувофиқликни кучайтиришга, шунингдек, Хитой—Марказий Осиё механизмини қуришга кўмаклашишга тайёр эканини қайд этган.
Аввалроқ Хитой раиси ўринбосари Хан Чжен Ўзбекистон ташқи ишлар вазири Бахтиёр Саидов бошчилигидаги делегацияни қабул қилгани тўғрисида хабар берилганди.
Изоҳ (0)