Тошкент шаҳрида 70 ёшли “Навоий-автосавдо” МЧЖ директори Ниёз Ибодов “Долзарб қирқ кунлик” доирасида бир қатор жиноятларни содир этганликда гумонланиб қўлга олингани хабар қилинган эди. У Жиноят кодексининг 165-моддаси 3-қисмида (жуда кўп миқдорда товламачилик) кўрсатилган жиноятни содир этганликда айбланмоқда.
Ижтимоий тармоқларда тарқалган хабарларга кўра, Ниёз Ибодовнинг ўғли судья бўлиб, отасининг қилмишига алоқадорлиги айтилган. Мазкур ҳолат юзасидан “Дарё” мухбири Судьялар олий кенгаши матбуот хизмати раҳбари Турсунали Акбаровдан изоҳ олди.
Товламачилик жиноятини содир этишда гумонланаётган “Навоий-автосавдо” МЧЖ директори Ниёз Ибодовнинг қилмишига унинг судья ўғлининг алоқадорлиги тўғрисида маълумотга эга эмасмиз. Мазкур ҳолатга фақат тергов йўли билан аниқлик киритилиши мумкин.
Гумондорнинг ўғли А.Ибодов жиноят ишлари бўйича Навбаҳор туман суди раиси лавозимида ишлагани рост. Бироқ у Судьялар одоби кодекси талабларини бузгани учун тўққиз ой аввал, яъни 2023 йилнинг 25 апрелида лавозимидан озод этилиб, судьялик ваколатлари муддатидан илгари тугатилган ва кенгаш томонидан бу ҳақда ўз вақтида жамоатчиликка маълум қилинган, — деди Турсунали Акбаров.
20 млрд сўмлик таҳдид
“Кун.уз” нашрининг суриштирувига кўра, Ниёз Ибодов “Навоий-автосавдо” МЧЖда 61,20 фоиз улушга эгалик қилган. МЧЖнинг 32,70 фоиз улуши эса Сардор Ғаффоровга тегишли бўлган.
Айтилишича, Ниёз Ибодов ўзининг жияни бўлган Сардор Ғаффоровни “Навоий-автосавдо” МЧЖдаги улушидан воз кечтириш бўйича Б.Султоновга мурожаат қилган. Б.Султонов, Ниёз Ибодов ва бошқа номаълум шахслар 2023 йилнинг июнь ойи бошларида бир гуруҳга бирлашиб, ишни “ҳал қилиш” учун олдиндан жиноий тил бириктирган.
Гуруҳ аъзолари Тошкент шаҳри Олмазор туманида жойлашган офисга Сардор Ғаффоровни чақириб, ундан автосалондаги 20 млрд сўмга тенг улушини 200 минг АҚШ доллари эвазига Ниёз Ибодов номига ўтказиб бериш ҳақида дўқ-пўписа қилиб, агар улушни ўтказиб бермаса, жисмонан йўқ қилиб юборишни айтишган.
Изоҳ (0)