Олий Мажлис Сенатининг қирқ тўққизинчи ялпи мажлисида “Ўзбекистон Республикасининг айрим қонун ҳужжатларига Ўзбекистон миллий қонунчилигини ЖСТ битимларига мувофиқлаштиришни назарда тутувчи ўзгартириш ва қўшимчалар киритиш тўғрисида”ги қонун кўриб чиқилди.
Қонунда интеллектуал мулк, реклама ва давлат божи билан боғлиқ бўлган миллий қонунчиликнинг қатор нормаларини Жаҳон савдо ташкилотининг талабларига уйғунлаштириш мақсадида “Ихтиролар, фойдали моделлар ва саноат намуналари тўғрисида”ги, “Товар белгилари, хизмат кўрсатиш белгилари ва товар келиб чиққан жой номлари тўғрисида”ги, “Реклама тўғрисида”ги, “Дори воситалари ва фармацевтика фаолияти тўғрисида”ги ва “Давлат божи тўғрисида”ги қонунларга ўзгартириш ва қўшимчалар киритилиши назарда тутилган.
Олий Мажлис Сенати раиси Танзила Норбоеванинг маълум қилишича, ЖСТга қўшилиш мамлакатнинг иқтисодий сиёсатининг асосий мўлжалларидан биридир.
Бу борадаги ислоҳотларни ҳуқуқий жиҳатдан таъминлаш мақсадида миллий қонунчилигимиз Жаҳон савдо ташкилоти битимларига мувофиқлаштирилмоқда.
Қонунларга киритилаётган ўзгартириш ва қўшимчалар Ўзбекистоннинг ЖСТга аъзо бўлиш жараёнининг жадаллашишига ҳамда интеллектуал мулк объектларининг ҳимоя қилинишини таъминлашга, мамлакатимиздаги сармоядорлар ва хорижий инвесторларга бир хил шарт-шароитлар ҳамда тенг рақобат муҳитини яратади.
Мазкур ҳужжат муҳим қадам бўлиб, ушбу ташкилотга аъзо бўлиш йўлидаги саъй-ҳаракатларимизни янада фаоллаштиради, — деди сенат раиси.
Аввалроқ Норбоева бугунги мураккаб даврда Ўзбекистонда ҳеч кимга қарам бўлмайдиган иқтисодни ривожлантиришга қаратилган мустақил сиёсат олиб борилаётганини урғулаган эди.
Изоҳ (0)