Бугун, 28-сентябр куни Тошкент шаҳрида АҚШ халқаро тараққиёт агентлиги (USAID)нинг “Марказий Осиё савдоси” дастури доирасида “Савдо олами” минтақавий конференцияси бўлиб ўтди. Конференция ишида халқаро савдо ривожлантиришдаги сўнгги тенденциялар ва жаҳон савдоси барқарорлигини таъминлаш масалалари муҳокама қилинди.
Анжуманда иштирок этган Жаҳон савдо институти профессори Питер Ван Ден Бош Ўзбекистоннинг ЖСТга аъзо бўлиш йўлидаги қадамлари ҳақида ўз фикрларини билдириб ўтди.
“Жаҳон савдо ташкилотига аъзоликнинг иқтисодий жиҳатларини муҳокама қилиш доим қийин кечган. Боиси бунга ҳамма давлат ҳам журъат қилолмайди. Аъзоликни мақсад қилганларда эса аввало маҳаллий, кейин эса ташкилот аъзолари билан рақобатлашиш борасида муаммолар бўлади — Ўзбекистонда ҳам шундай.
Мен ўз тажрибамдан келиб чиқиб айтоламанки, бу йўлда сиёсий кўмак энг кераклиси бўлади”, — деди профессор Питер Ван Ден Бош
Минтақавий конференция уч йўналишда иш олиб борди:
- пандемиядан кейинги даврда ЖСТ ва савдо тенденциялари;
- ҳукуматга қўшилишнинг кейинги даври ва унинг муаммолари;
- озиқ-овқат соҳасидаги хавфлик қоидаларини амалга оширишдаги муаммолари яъни қишлоқ хўжалигидаги озиқ-овқат хавфсизлигини халқаро стандартлари билан уйғунлаштириш, озиқ-овқатдаги хавфсизликни таъминлаш, шу билан биргаликда қишлоқ хўжалиги маҳсулотлари экспортини кенгайтиришдаги зарур чораларни кўриш.
Биринчи йўналишда ҳозирги пайтдаги савдо тенденциялари, етказиб бериш билан боғлиқ тўсиқлар ва унинг геосиёсат ва савдога тўғридан тўғри таъсири ҳақда сўз борди. Шунингдек, савдо ва атроф-муҳит муаммоларининг боғлиқлиги ҳамда рақамли савдога бўлган эҳтиёжнинг ортиб бораётганлиги муҳокама қилинди.
Иккинчи йўналишда Марказий Осиё давлатларидан келган иштирокчилар ЖСТга аъзо бўлиш тажрибаси билан ўртоқлашдилар. Аъзолик билан боғлиқ муҳим музокараларни якунлаш, шунингдек, ташкилотга аъзоликнинг асосий афзалликлари ва муҳим масалалари кўриб чиқилди.
Учинчи йўналиш ишида эса озиқ-овқат масалалари муҳокама қилинди. Унда қишлоқ хўжалиги ишлаб чиқаришида хавфсизлик чораларини таъминлаш, инновациялар ва халқаро стандартларни қўллаш орқали хавфсиз озиқ-овқат савдосини таъминлаш кўзда тутилган. Шунингдек, санитария ва фитосанитарияда халқаро ташкилотлар тажрибасини қўллашга доир масалаларга тўхталиб ўтилди.
Аввалароқ 19-сентябр куни президент Шавкат Мирзиёев БМТ Бош ассамблеясининг 78-сессияси доирасида Жаҳон савдо ташкилоти (ЖСТ) бош директори Нгози Оконжо-Ивеала билан учрашув ўтказган эди. Унда ЖСТ бош директори Ўзбекистон томонидан ташкилотга аъзо бўлиш борасида кўрилаётган чораларни юқори баҳолаган. Нгози Оконжо-Ивеала ЖСТ котибияти Ўзбекистоннинг саъй-ҳаракатларини тўлиқ қўллаб-қувватлашини ҳамда мамлакат яқин келажакда ташкилотга қўшилишига ишонч билдирганди.
Изоҳ (0)