Самарқандда 2 ноябрь куни Эммануэл Макронни тантанали кутиб олиш маросими бўлиб ўтганди. Шундан сўнг Ўзбекистон ва Франция президентларининг тор доирадаги учрашуви ўтказилди.
.jpg)
Президент матбуот хизматининг хабар беришича, учрашув аввалида Шавкат Мирзиёев Франция президентининг Ўзбекистонга охирги 30 йилдаги илк ташрифи тарихий аҳамиятга эга эканини алоҳида таъкидлади. Эммануэл Макрон давлати раҳбарига ташриф билан келиш таклифи ҳамда Франция делегациясига кўрсатилаётган самимий меҳмондўстлик учун миннатдорлик билдирди.
Франция Ўзбекистоннинг Марказий Осиёда ишончни мустаҳкамлаш борасидаги саъй-ҳаракатларини, шунингдек, Ўзбекистоннинг ЖСТга аъзо бўлишини ҳамда Евроиттифоқ билан Кенгайтирилган шериклик ва ҳамкорлик тўғрисидаги битим тез фурсатда имзоланишини бундан буён ҳам қўллаб-қувватлашга тайёр экани таъкидланди.
Сиёсий мулоқотни давом эттириш, хавфсизлик, юзага келаётган таҳдид ва хатарларга самарали қарши курашиш соҳасидаги ҳамкорликни мустаҳкамлаш муҳимлиги қайд этилди.
Маданий-гуманитар ҳамкорлик кун тартиби бой экани мамнуният билан таъкидланди. Ўзбекистонда француз тилини ўрганишга қизиқиш ортиб бораётгани айтилди. Шу муносабат билан томонлар Франция альянсининг Самарқанддаги филиали очилишини олқишлади.
Тошкент шаҳрида Ўзбекистон—Франция олий таълим муассасасини очишни тезлаштириш ҳамда француз тили ўқитувчиларини тайёрлаш борасидаги ҳамкорликни кенгайтиришга келишиб олинди.
Изоҳ (0)