Навоий вилояти Навбаҳор туманида ер майдони сотиш билан боғлиқ фирибгарлик ҳолати фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Конимех туман бўлими томонидан ИИБ ходимлари билан ҳамкорликда тезкор тадбир ўтказилган. Тадбирда З.Ҳ. исмли шахс ва бошқалар ўзаро тил бириктириб, фуқаро Х.Т.га тегишли Навбаҳор туманидаги 24 сотих бўш ер майдонида гўёки қурилиш ишлари амалга оширилгани тўғрисидаги сохта ҳужжатлари асосида фуқаро Э.К.га фирибгарлик йўли билан 150 миллион сўмга сотган вақтида ашёвий далиллар билан ушланган.
Шунингдек, терговга қадар текширув давомида Б.Ж.исмли шахс фуқаро З.Ҳ.га ушбу ер майдонига кадастр ҳужжатларини тайёрлаб бериши эвазига 5,2 миллион сўмини қўлга киритгани аниқланиб, ушбу пуллар ҳисобидан 3,7 миллион сўмнинг қайтарилиши процессуал тартибда расмийлаштирилган.
Мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Аввалроқ Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди. Апрель бошларида эса Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.
Изоҳ (0)