Давлат хавфсизлик хизмати ходимлари томонидан Андижон вилояти ва Қорақалпоғистон Республикасида ер майдонларини ноқонуний сотиш ҳолатларига чек қўйилди.
Қайд этилишича, ДХХнинг Андижон вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда тезкор тадбир ўтказилган. Тадбирда Шаҳрихон туманида яшовчи 43 ёшли шахс ўзганинг ишончига кириб, кадастр тизимидаги танишлари орқали 8 сотих нотурар ер майдонини турар жой тоифасига ўзгартириб, унинг номига расмийлаштириб бериш эвазига 28 минг доллар олган вақтида ушланган.
Андижон вилоятининг Олтинкўл туманидаги пахта ва ғалла етиштиришга ихтисослашган фермер хўжалик раҳбари бошқа бир фермер хўжалик балансида бўлган 50 сотих ер майдонини гўёки ўзига тегишли эканини айтиб, уни харидорга 117,5 минг долларга сотишга келишиб, олдиндан 20 минг доллар олган вақтида қўлга олинган.
Давлат хавфсизлик хизматининг Қорақалпоғистон Республикаси бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда ўтказилган тезкор тадбирда Қўнғирот туманида яшовчи, 64 ёшли шахс ўзганинг ишончига кириб, давлат захирасида бўлган 25 гектар ер майдонини мансабдор танишлари орқали унинг номига расмийлаштириб бериш эвазига 85 миллион сўм олган вақтида ушланган.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Август ойида Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди. Апрель бошларида эса Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.
Изоҳ (0)