Туркманистон Халқ Маслаҳати раиси Гурбангули Бердимуҳамедов Baykar компанияси бош директори Ҳалук Байрактар ва BМC компанияси бошқарув кенгаши директори Фуат Тосяли билан учрашди. Бу ҳақда ТDH ахборот агентлиги хабар берди.
Хабарга кўра, учрашувда мудофаа саноати соҳасида дунёда етакчи ўринни эгаллаган турк компаниясининг таклифлари кўриб чиқилиб, тегишли келишувларга эришилган.
“Туркманистонга дунёда кенг талабга эга бўлган юқори сифатли маҳсулотларнинг янги замонавий намуналарини етказиб бериш шериклик муносабатларини янада мустаҳкамлашга муносиб ҳисса бўлади”, — дейилади хабарда.
Baykar Туркиянинг етакчи дрони ва сунъий интеллект компанияси ҳисобланади. Компания томонидан ишлаб чиқарилган ускуналар орасида Украинада қўлланилиши туфайли машҳур бўлган Bayraktar ТB2 ҳужумчи дрони бор. Ушбу қурилманинг бир қанча нусхалари сентябрь ойида Туркманистон Мустақиллик куни шарафига ўтказилган ҳарбий парадда намойиш этилган эди.
BМC компанияси танклар ва дронлар ишлаб чиқаради ва “Турк Қуролли кучлари ва унинг ҳарбий иттифоқчилари эҳтиёжларини қондиради”.
Телерепортаждаги кадрларга қараганда, Гурбангули Бердимуҳамедов каталогдан қурол танлаган. Нима сабабдан ҳарбий техника танлаш ва харид қилишда тегишли вазирлик вакиллари эмас, балки Халқ кенгаши раиси иштирок этаётгани тушунтирилмаган.
Изоҳ (0)