“Бахти Ташкентский” номи билан танилган Бахтиёр Қудратуллаевнинг шериги Туркманистонда қўлга олинди. Бу ҳақда “Хроника Туркменистана” манбаси хабар берди.
Хабарга кўра, 7 декабрь куни Ўзбекистон махсус хизматлари туркманистонлик ҳамкасбларига жиноий гуруҳ аъзоларидан бири Туркманистон билан чегарани ноқонуний кесиб ўтиб, қочишга муваффақ бўлгани ҳақида тезкор маълумот берган.
Туркманистон Миллий хавфсизлик вазирлигига гумонланувчи Наргиза Жуманиязованинг (24 декабрда ҳибсга олинган) синглиси Бибижон Жуманиязованинг уйида экани ҳақида маълумот берилган. Қидирув натижасида эркак 9 декабрь куни қўлга олинган, эртаси куни эса “Шовот” чегара божхона постида Ўзбекистон махсус хизматларига топширилган.
Бибижоннинг уйидан жиноий гуруҳ аъзосидан ташқари Ўзбекистонда ишлаб чиқарилган 12 қути дори воситалари топилган. Маълум бўлишича, аёл дори воситалари контрабандаси билан шуғулланган. Унга нисбатан жиноий иш қўзғатилган.
Ўзбекистонда жиноий гуруҳлар аъзоларини қўлга олиш бўйича оммавий рейдлар ўтказилди. Жумладан, “Бахти Ташкентский” қўлга олиниб, 15 суткага қамалди.
У билан бирга яна икки шахс — Дилшод Шарипов ва Анвар Мирзахановлар ҳибсга олинди. 24 декабрда эса Бахтиёр Қудратуллаевнинг ўғли ва гуруҳнинг яна бир қанча аъзолари, жумладан Наргиза Жуманиязова ҳам ҳибсга олинганди.
Изоҳ (0)