Қозоғистон Бош прокуратураси Қарағандадаги Костенко конида октябрда юз берган фожиа бўйича тергов яқин орада якунланишини маълум қилди.
“Шахтадаги портлашлар бўйича тергов якунланмоқда. Коннинг тўққиз нафар мансабдори гумондор деб топилди ва ҳибсга олинди”, — дейилади Бош прокуратура хабарида.
28 октябрь куни ўша вақтда “Arselor Mittal Temirtau”га тегишли бўлган Костенко кўмир конида бир қатор портлашлар содир бўлди, оқибатда 46 киши ҳалок бўлди, 28 нафар кончи жароҳат олди. Шундан сўнг ҳукумат компанияга эгалик ҳуқуқини Қозоғистон тасарруфига ўтказишга қарор қилди.
Кейинчалик Allur компаниялар гуруҳи директорлар кенгаши раиси Андрей Лаврентев компаниянинг янги инвесторига айланди. Компания номи Qarmet деб ўзгартирилди.
Республика Фавқулодда вазиятлар вазири Сирим Шарипхонов кондаги портлашга олиб келган қонунчилик бузилишида 19 киши иштирок этган бўлиши мумкинлигини айтди, улар орасида “Arselor Mittal Temirtau” собиқ бош директори Владимир Яблонский, кадрлар бўйича директор Елена Винокурова, кўмир департаменти техник директори Андрей Белий ва бошқалар бор.
Изоҳ (0)