Қарағандадаги Костенко конида содир бўлган портлаш қурбонлари сони 33 кишига етди. Бу ҳақда Қарағанда вилояти ҳокими Эрмаганбет Булекпаевга таяниб, Tengrinews хабар берди.
“Айни пайтда Костенко конида юз берган фожиа 33 нафар кончининг ҳаётига зомин бўлди. Яна 13 нафар кончи бедарак йўқолганлар рўйхатида. Дастлабки версияга кўра, лавада ёнғин содир бўлган. 252 кончидан 208 нафари ер юзасига олиб чиқилган, улардан 18 нафари тиббий ёрдамга мурожаат қилган”, — деди Булекпаев.
Ҳокимнинг сўзларига кўра, жабрланганларнинг барчаси шифокорлар назоратида.
Кондаги портлаш сабаблари
Дастлабки версияга кўра, портлашга ёнғин ва унинг ортидан метан-ҳаво аралашмасининг кейинги портлаши сабаб бўлган. Метан-ҳаво аралашмасининг портлаши, зарба тўлқини жуда кўп қурбонларга олиб келган.
Кондаги портлаш ёнғин ҳақида хабар берилганидан кейин содир бўлган.
“Портлашнинг кучи шундай бўлганки, ғарбий ва шарқий блоклардаги телекоммуникация тизими ишдан чиққан. Зарба тўлқини нафақат фавқулодда вазият ҳудудига, балки шарқий блокда жойлашган К2 лавасига ҳам таъсир кўрсатган. Зарба тўлқинининг тарқалиш диапазони 2 километрдан ошган”, — дейилади хабарда.
Изоҳ (0)