Қозоғистоннинг Қарағанда вилояти, Костенко шахтасидаги аварияда ҳалок бўлган охирги кончининг жасади ҳам топилди. Шу тариқа қурбонларнинг умумий сони 46 кишига етди. Бу ҳақда Қозоғистон Фавқулодда вазиятлар вазирлиги раҳбари Сирим Шарипхоновга таяниб, Tengrinews хабар берди.
“Қидирув-қутқарув ишлари давомида 45 нафар кончининг жасади ва 46-марҳумга тегишли экани тахмин қилинаётган қолдиқлар топилди. Ҳозирда 40 кишининг шахси аниқланган, олти нафарининг эса йўқ. Уларни аниқлаш бўйича зарур экспертиза ўтказилмоқда”, — деди вазир.
У қурбонларнинг шахсини аниқлаш учун ДНК текшируви талаб этилишини таъкидлади.
29 октябрь куни кечқурун 45 нафар кончининг жасади топилганди. Шундан сўнг Қозоғистон Фавқулодда вазиятлар вазирлиги матбуот хизмати қутқарувчилар яна бир ишчини қидиришда давом этаётгани ҳақида хабар берди.
Эслатиб ўтамиз, Костенко номидаги конда 28 октябрь куни эрталаб метан портлаши содир бўлди. Воқеа пайтида конда 252 киши бўлган, 205 нафар кончи мустақил равишда ер юзасига чиққан, улардан 18 нафари тиббий ёрдамга мурожаат қилган. Воқеадан кейин мамлакатда мотам эълон қилинди.
Қозоғистонда бахтсиз ҳодисадан сўнг кон ёки қурилиш ишларини олиб боришда хавфсизлик қоидаларини бузиш моддаси бўйича судгача тергов бошланди. Воқеа ҳолатларига ойдинлик киритиш учун ҳукумат комиссияси тузилди.
Бундан ташқари, Қозоғистон президенти Қосим-Жўмарт Тўқаев конга эгалик қилувчи АрcелорМиттал Темиртау (АМТ) компанияси раҳбариятини алмаштирди.
Изоҳ (0)