“Дарё” нашрида 10 сентябрь куни “Қарши шаҳри ҳокими Нормўмин Холбоев ўзини рағбатлантириш учун 75 миллион сўм маблағ ажратиш ҳақида қарор чиқарди”, номли материал эълон қилинган эди.
Унда август ойида шаҳар ҳокими Нормўмин Холбоев томонидан имзоланган қарорда 1-сектор яъни ҳоким сектори вилоятдаги “Энг ташаббускор сектор” дея эътироф этилган. Шунга мувофиқ, захира маблағларидан ҳокимга 75 миллион сўм ажратиш қайд этилган. Ҳокимлик мазкур ҳолатни Вазирлар Маҳкамасининг қарорига мувофиқ дея баёнот берган эди.
Ҳолат юзасидан Коррупцияга қарши курашиш агентлиги ахборот хизмати “Дарё”га изоҳ берди.
Айтилишича, Қарши шаҳар ҳокимининг қарори амалдаги қонунчилик ҳужжатлари талабларига зид тарзда қабул қилингани аниқланиб, агентлик томонидан Коррупцияни келтириб чиқарувчи сабаб ва шарт-шароитларни бартараф этиш чораларини кўриш тўғрисида тақдимнома киритилган.
“Тақдимномага асосан, Қашқадарё вилоят ҳокимининг 2023 йил 19 сентябрь куни 414-4-0-Қ/23-сон қарори билан Қарши шаҳар ҳокимининг ушбу қарори бекор қилинди.
Шунингдек, мазкур ҳолатда қонун бузилишига йўл қўйган шахсларга тегишли қонуний чора кўриш учун Агентлик томонидан тўпланган ҳужжатлар Бош прокуратура ҳамда Иқтисодиёт ва молия вазирлигига юборилди”, — дейилади агентлик ахборотида.
Қўшимча қилинишича, агентлик фуқаролик жамияти вакилларининг жамоатчилик назорати ва фаол фуқаролик позициясини қўллаб-қувватлайди ҳамда давлат органлари ва ташкилотларидаги ҳар қандай кўринишдаги коррупциявий хавф-хатарларга муросасиз муносабатда бўлишга чорлайди.
Мавзуга доир:
Изоҳ (0)