Франция Украинага 40 га яқин SCALP ракеталари, бир неча юз бомба ва Ceaser ўзиюрар артиллерия бирликларини (SPG) беради, деди президент Эммануэль Макрон матбуот анжуманида. Унинг сўзларини Le Monde нашри келтирди.
Франция президенти Киев билан хавфсизлик кафолатлари бўйича икки томонлама келишув устида ишлаётганини, бу келишув бир неча ҳафта ичида имзоланиши кераклигини қўшимча қилди.
“Февраль ойида Украинага бораман. Ушбу матнлар ниҳоясига етказилганини эълон қиламан. Сўнг ҳозир мен айтаётган снарядларни етказиб бериш бошланади”, — дея қўшимча қилди Макрон.
Украинага қурол етказиб бериш бўйича АҚШдан кейин Германия (17,1 миллиард евролик) ва Буюк Британия (6,6 миллиард евролик) етакчилик қилмоқда. Франция атиги 0,54 миллиард евролик, Италия 0,69 миллиард евролик, Испания 0,34 миллиард евролик қурол ўтказган.
Украина армияси SCALP’нинг биринчи партиясини ўтган ёзда олганди. SCALP-EG — Британиянинг Storm Shadow ракетасининг французча версияси. Ракета 1990 йилларда Маtra ва British Aerospace компаниялари томонидан ишлаб чиқилган, кейин МBDА томонидан иккита версияда ишлаб чиқарилган: ракета 500 километргача бўлган масофадаги нишонларни уришга қодир.
Изоҳ (0)