Франция президенти Эммануэл Макрон 16 июнь куни Саудия Арабистони валиаҳд шаҳзодаси Муҳаммад бин Салмонни қабул қилди. Улар Украина ва Яқин Шарқдаги уруш бўйича музокаралар ўтказади. Бу ҳақда Politico хабар берди.
Елисей саройи расмий вакилига кўра, ўзаро кечки овқат пайтида Макрон бин Салмонга Россияга таъсиридан фойдаланиш учун “босим қилади”. Муҳаммад бин Салмон бир ҳафталик ташриф билан Парижда бўлиб, у янги глобал молиявий пакт саммитида иштирок этишни ва келаси душанба куни Саудия Арабистонининг Бутунжаҳон Expo 2030 кўргазмасига мезбонлик номзодини қўллаб-қувватлаш учун Париждаги зиёфатда қатнашишни режалаштирган.
Politicoънинг қайд этишича, Саудия Арабистонининг Россиянинг Украинага қарши ҳужумига нисбатан позицияси аввал ҳам “ноаниқ” эди. Сабаби Ар-Риёд бир томондан БМТнинг Россия агрессиясини қораловчи резолюцияларига овоз берган бўлса, иккинчи томондан, Россия нефть даромадларини камайтириш мақсадида АҚШнинг нефть ишлаб чиқаришни кўпайтириш чақириғига қарши чиққан.
Бироқ Елисей саройи вакилининг сўзларига кўра, Саудия Арабистони бу борада “олдинга силжиганини” кўрсатди.
“Биз Саудия Арабистонидан Украина ва Россия ўртасидаги музокараларга олиб келадиган Украина ғалабасини тезлаштиришда ёрдам беришини сўраймиз. Суҳбатларга асосланиб, улар ҳам шундай қарашга эга эканини биламиз”, — дейди Елисей саройи расмийси.
Макрон ва бин Салмон ўртасидаги музокараларда Саудия Арабистони ва Эрон ўртасидаги муносабатларни тиклаш ва Ливандаги кескинликни ҳал қилишда ёрдам беришга ҳам эътибор қаратилади.
Изоҳ (0)