Фарғона вилояти ИИБ Фарғона шаҳридаги кўнгилочар масканларнинг бирида ички ишлар ходими ва фуқаро ўртасида юз берган жанжал юзасидан маълумот берди.
Қайд этилишича, 2023 йил 17 декабрь куни фуқароларнинг ИИОга шикояти асосида Фарғона шаҳар ИИО ФМБ 3-сон ИИБ профилактика инспектори капитан Т.Ҳошимов тунги соат 23:50 да шаҳардаги “Машъал” МФЙдаги кўп қаватли уйнинг ертўласида жойлашган Rich кўнгилочар масканига (караоке-бар) келган. Ходим тунги вақтда фуқароларнинг тинчини бузиб, баланд овозда қўшиқ куйлаётган ва компьютер ўйнаётган мижозларни тарқатмоқчи бўлганида, ушбу маскан раҳбари 29 ёшли А.Х. ИИО ходимларининг қонуний талабларига бўйсунмай, жамиятда юриш-туриш қоидаларини қасддан менсимасдан, фаол қаршилик кўрсатган.
Вазирлар Маҳкамасининг 2021 йил 15 октябрдаги 648-сон қарори 11-бандида кўп квартирали уйнинг ертўласида жойлашган корхоналар, ресторанлар, кафелар, барлар ҳамда кўнгилочар масканларнинг соат 23:00 дан кейинги фаолиятига йўл қўйилмаслиги кўрсатиб ўтилган.
Мазкур ҳолат юзасидан фуқаро А.Х.га нисбатан Маъмурий жавобгарлик тўғрисидаги кодекснинг 183 (майда безорилик) ва 194-моддалари (Ички ишлар органлари ходимининг қонуний талабларини бажармаслик) билан ҳужжатлар расмийлаштирилиб, қонуний қарор қабул қилиш учун жиноят ишлари бўйича Фарғона шаҳар судига юборилган.
Эслатиб ўтамиз, март бошларида Қашқадарё вилояти Шаҳрисабз шаҳрида ички ишлар органи ходимининг овқатланиб ўтирган жойига бостириб кириб, тасвирга олган ва ижтимоий тармоқларга тарқатганларга чора кўрилганди. Шунингдек, апрель ойида Тошкентда ички ишлар ходимини ўлдириб, ёқиб юборган 3 эркакка ҳукм ўқилгани тўғрисида хабар берилган эди.
Изоҳ (0)